Jýrnalıs, qoǵam belsendisi Dıas Nuraqyn óziniń facebook paraqshasynda elge eńbek etemin dep ajal qushqan kóp balaly áke jaıly jazba jarıalady. Dálirek aıtqanda, jekesine oqyrmandarynyń biri hat joldaǵan, dep habarlaıdy Alash.kz.
Hatta Atyraýǵa gýmanıtarlyq kómekke attanǵaly otyrǵan Qaıyrbek esimdi 7 balanyń ákesi oqystan mert bolǵandyǵy týraly baıandaıdy.
13.04 kúni Atyraýǵa kómekke attanǵaly jatqan baýyrymyz Hovo júk kóligin vagonǵa artyp jatqanda oqystan kólik dońǵalaǵy vagonnan taıyp ketip, óz kóliginiń astynda qalyp qoıyp 7 balanyń ákesi 37 jasar Qospanov Qaıyrbek Álimbekuly degen baýyrymyz marqum boldy. Bala kúnimnen birge ósken ári kórshim ári dosym edi. Óte meıirimdi kimge kómek qajet bolsa qol ushyn sozýǵa asyǵyp turatyn azamat edi. Sońǵy is áreketi de eli úshin kómekke asyǵý bolypty. Kómekke attanar aldyn óte qýanyshty halde bolyp júr edi, jaqsy tilekter aıtyp shyǵaryp salyp edik, amal neshik jete almady.
Oqıǵa Túrkistan oblysy, Ordabasy aýdany, Badam eldi mekeniniń temir jol stansıasynda oryn aldy. Biraq oqıǵa stansıanyń Shymkent qalasyna tıesili aımaǵy bolyp sanalady eken. Bul týraly qala ákimdigi de habardar. Qala ákimi óz atynan kóńil aıtý hatyn joldaǵan eken, biraq hatty otbasyna jetkizýge ázirshe Atyraýǵa jedel túrde kómek jóneltilip jatýyna baılanysty áli tabystalyp úlgermedi. Hattyń tek elektrondy nusqasymen tanystyq. Sózime dálel bolsyn dep jazyp otyrmyn bul málim etti.
Eli úshin janyn bergen azamat Túrkistan oblysy, Ordabasy aýdany, Yntaly aýylynyń turǵyny edi. Búgin janazasy shyǵarylyp jer qoınyna tapsyryldy. Sizden ótinerim, eldiń aldynda júrgen azamatsyz ǵoı, osyndaı eli úshin janyn qıǵan azamattarymyzdy el tanyp, óz dárejesinde esimi qurmettelýine yqpal etseńiz. Janaza t.b shyǵyndaryn aýyl bolyp kóterip ótkizdi. Ata anasy erte ómirden ótken, óziniń 8 bala shaǵasy bar edi birer aı aldyn bir balasy shetinep 7 eýi qaldy. Bala shaǵasyna obal boldy. Óziniń basynda baspanasy da joq, inisiniń úıinde turatyn edi. Qolynda múgedek inisi bar. Óte aýyr boldy otbasyna. Osy týraly ózińiz post jazyp er esimin halyqqa tanytsańyz,- degen oqyrman óz jazbasynda.
Dıas Nuraqyn sóz sońynda óz oqyrmandaryna kóp balaly ákege aqshalaı kómek jınap beremiz be degen saýal qoıdy.
P.S. Jurttan jylý jınaý, aqsha suraý ádetimde joq edi. Biraq myna jigittiń artynda 7 bala jetim qalypty. Tasqynnan zardap shekkenderge kómekke baramyn dep sheıit bolǵan eken. Bálkim, qarjylaı qoldaý kórsetip, otbasyna az da bolsa kómek kórsetsek qalaı bolar eken? Álde, tasqynnan zardap shekkenderge dep qarajat jınap jatqan qorlardyń biri qaraılasar. Oqyrmandar arasynda jomart jandar bolsa ony da aıtyńyzdar. Qysqasy, sizdermen aqyldasý úshin jazyp otyrmyn. Oılaryńyzdy jazyńyzdar. Sbor ashaıyq deseńizder ony da oılastyraıyq.
