«Keıbir kásipker satylǵan taýarlar men qyzmetter úshin tólemdi mobıldi aýdarymdar arqyly alady. Alaıda bul aýdarymdar kasalyq apparattardy, POS-termınaldardy jáne QR-kodtardy qoldanbaı júrgiziledi. Soǵan sáıkes túbirtek (chek) berilmeıdi jáne tutynýshylardyń quqyqtary buzylady», – dedi vıse-mınıstr Erjan Birjanov.
Onyń aıtýynsha, memleket mobıldi aýdarymdardyń barlyǵyn birdeı teksermeıdi. Túrli tulǵalardan 3 aı qatarynan aı saıyn 100 nemese odan da kóp mobıldi aýdarymdar alǵan tulǵalar ǵana tekserýge jatady. Iaǵnı kásipkerliktiń belgileri baıqalǵan jaǵdaıda tekserý júrgiziledi.
«Jeke tulǵalar burynǵydaı ózderiniń jeke maqsattary úshin týystaryna, dostaryna, ata-analaryna, balalaryna jáne basqa da ómirlik jaǵdaılarǵa baılanysty mobıldi aýdarymdar jasap, qabyldaı alady. Buǵan qatysty eshqandaı shekteý joq», – dedi Birjanov.
«Tólemder jáne tólem júıeleri týraly» zańnyń normalaryna sáıkes túrli tólem túrleri bar. Mysaly, bank kartasy, QR-tólem nemese qolma-qol aqsha arqyly. Qolma-qol aqshasyz tólemderdi qabyldaýdan bas tartý zańsyz. Mundaı jaǵdaıda tutynýshylardyń quqyǵy buzylady.
«Kásipkerler tólem kartalary arqyly tólemderdi qabyldaýdan birinshi ret bas tartsa, onda eskertý beriledi. Al mundaı quqyq buzý qaıtalansa, onda 147 680 teńge mólsherinde aıyppul salynady. Qolma-qol aqshasyz tólemderdi qabyldaýdan bas tartý faktileri týraly turǵylyqty jeri boıynsha memlekettik kiris organdaryna júginý qajet», – dedi vıse-mınıstr.
Ol taksı júrgizýshileriniń qyzmetine qatysty máselege de toqtaldy.
«Jeke tasymaldaýshylar jeke kásipker retinde tirkelýi kerek. Muny e-Salyq Business, eGov mobile mobıldi qosymshalary jáne keıbir ekinshi deńgeıdegi bankterdiń qosymshalary arqyly jasaýǵa bolady. Bul rette qolma-qol aqshasyz tólemderdi qabyldaý úshin onlaın rejıminde kásipkerlik bank shotyn ashýǵa bolady. Onda kórsetilgen qyzmetter úshin tólemder alynady. Ol úshin sizge tek smartfon qajet. Kasalyq apparattar men POS-termınaldardy alyp júrýdiń qajeti joq. Qazirgi tańda salyq mindettemelerin adal oryndaý áldeqaıda tıimdi», – dedi ol.
Onyń sózinshe, búginde salyq rejımderiniń tártibi jeńildetildi, salyq stavkalary kásipkerlik túrlerine baılanysty tek 1%-dan 4%.
«Eger mundaı jaǵdaıda kásipker mobıldi aýdarymdar qabyldasa, onda ol qazirdiń ózinde «kóleńkede» qalyp, salyq baqylaýyna túsedi. Bul rette mobıldi aýdarymdardy tekserý adal salyq tóleýshilerge áser etpeıdi», – dedi Erjan Birjanov.
