Tiri bolsam, qazaqqa qyzmet etpeı qoımaımyn!

Álıhan Bókeıhan

Taý týrızmi festıvalinde Shaǵan shyńyna tórt júzden astam adam shyqty (FOTO)

06 maýsym 2024 195

Taý týrızmi festıvalinde Shaǵan shyńyna tórt júzden astam adam shyqty. Bul týraly Jetisý oblysy ákiminiń baspasóz qyzmeti málimdedi. 

Jetisý oblysynda ekinshi jyl qatarynan erekshe sporttyq-týrıstik festıvál ótkizilýde. Festıvaldiń basty maqsaty – salaýatty ómir saltyn, sportpen turaqty shuǵyldanýdy nasıhattaý, óńirde taý jáne ekologıalyq týrızmdi damytý múmkindikterin kórneki túrde pash etý.

Bul joly festıválǵa jergilikti turǵyndarmen qatar Almaty qalasynan da qatysýshylar keldi, olardyń sany 400-den asty. Shaǵan shyńyn baǵyndyrýǵa kelgender 13 shaqyrymǵa kóterilip, teńiz deńgeıinen 2551 metr bıikke shyqty. Bul rette eń jas qatysýshy 5 jasta bolsa, eń úlkeni 70 jastan asqan, - dep habarlaıdy Jetisý oblysy ákiminiń baspasóz qyzmeti.

Bıylǵy jyly da «Visit Zhetysu» týrısik-aqparattyq ortalyǵy oblystyń kásipkerlik jáne ındýstrıalyq-ınnovasıalyq damý basqarmasymen birlesip, Kóksý aýdandyq ákimdiginiń qoldaýymen «Shagan Fest-2024» festıvalin burynǵydaı Kóksý aýdany Aqtóbe aýylynyń mańynda ótkizdi.

Qatysýshylardyń qadamyna sáttilik tilegen basqarma basshysy Baqytnur Baqytuly bul festıvál óńirdegi ekologıalyq jáne taý týrızmin damytýǵa baǵyttalǵanyn atap ótti.
Bıikke shyǵar aldynda qatysýshylar ózderiniń hal-ahýaly úshin jaýapkershilik alatyny týraly mindetti qujatty, marshrýt barysyndaǵy jeke qaýipsizdik erejeleri men minez-qulyq qaýipsizdigi týraly nusqaýlyqty toltyryp, tirkeýden ótti.

Munan soń fıtnes-jattyqtyrýshymen birge shaǵyn jattyǵý jasady.

Jalpy, marshrýttyń uzyndyǵy shamamen 13 km. «Visit Zhetysu» týrısik-aqparattyq ortalyǵynyń basshysy Jandos Nurıev festıváldiń basty maqsaty Jetisý oblysynda taý týrızmin nasıhattaý, múmkindiginshe kóp adamdy, ásirese jastardy salaýatty belsendi demalysqa tartý ekenin atap ótti.

«Shagan Fest-2024» festıvalin ótkizý jaqsy dástúrge aınalýda. Bul joly jasy, kásibi men qyzyǵýshylyǵy san túrli 400-den astam qatysýshy Taldyqorǵan, Almaty, Tekeli qalalarynan, Saryózek aýylynan kelip otyr. «Bike Team», «VeloTravelTekeli», «VeloFriends» veloqoǵamdary, sondaı-aq «Jońǵarıa», «Istokı» balalar-jasóspirimder týrısik klýbtary, «Atameken» fıtnes-ortalyǵynyń jattyqtyrýshylary, Taldyqorǵan joǵary polıtehnıkalyq koleji men İ. Jansúgirov atyndaǵy Jetisý ýnıversıtetiniń stýdentteri belsendilik kórsetti, ıaǵnı qatarymyzdyń kóbi jastar. Sonymen qatar bizde festıválǵa ekinshi jyl qatarynan qatysyp otyrǵandar da bar, tipti búkil otbasymen kelgender de bar, biz buǵan qýanyshtymyz.

Osylaısha, birte-birte «Shagan Fest» Jetisýdyń jaıaý jáne taý týrızminiń kórnekti sharasyna aınalyp keledi, - deıdi J.Nurıev.


Taý shyńdaryn baǵyndyrýshylar úshin Taldyqorǵannan transfer uıymdastyryldy, sý, qorektik batondar, aıyrym bilezikteri taratyldy, marshrýttyń sońynda taza aýada keshki as berildi. Sonymen qatar taýǵa kóterilý men túsý kezinde uıymdastyrýshylar qaýipsizdikti qamtamasyz etip qana qoımaı, qajet bolǵan jaǵdaıda kómek kórsetý úshin marshrýtta motosıklder men arnaıy kólikter de júrdi.

Atap ótsek, taýdan tómen túsken kezde qatysýshylar jol boıynda kezdesken turmystyq qoqystardy, negizinen plasıkalyq bótelkeler men polıetılen paketterdi jınady. Bul qoǵamdaǵy ekomádenıettiń nyǵaıyp kele jatqanyn kórsetse kerek.

Uıymdastyrýshylar bul sońǵy taý festıvali emes ekenin aıtady. Oblystyq kásipkerlik jáne ındýstrıalyq-ınnovasıalyq damý basqarmasynyń basshysy Baqytnur Baqytulynyń aıtýynsha, shilde aıynyń ekinshi jartysynda óńirde balalar men jasóspirimder týrızmin qoldaýǵa arnalǵan 2 iri is-shara ótkizý josparlanǵan.


- «Uly dala eli» ekspedısıasyn jáne «Uly Jońǵar Alataýy» týrıadasyn ótkizemiz. Birinshisi - shaǵyn saıahat, ekinshisi - jarys. Marshrýttar qazir pysyqtalýda. Jetisý oblysynda taý týrızmin damytýdyń áleýeti zor ekenin eskere otyryp, osy baǵyttaǵy jumysty jalǵastyramyz. Týrızmniń bul baǵyty ásirese Sarqan, Eskeldi aýdandary men Tekeli qalasyna qatysty. Qora shatqalynda Ortalyq Azıadaǵy eń bıik Burhanbulaq sarqyramasy - basty kórikti jerlerimizdiń biri, - deıdi B.Baqytuly.

Bul maqala týraly ne oılaısyz?