Mońǵolıadaǵy Baıan-Ólgeı aımaǵyna qarasty Ólgeı sumynynyń oqýshylary Qazaqstandaǵy sý tasqynynan zardap shekken halyqqa qoldaý bildirip, vıdeosálemdeme joldady. Bul týraly "Otandastar qory" habarlady.
"Otandastar qory" baspasóz qyzmetiniń habarlaýynsha, Ólgeı sumynynda ornalasqan №1 jalpy bilim beretin mektebiniń 6 "B" synyp oqýshylary Qazaqstanda sý tasqynynan zardap shekken aımaq balalaryna 200 myń tógróg aqsha aýdardy. Sondaı-aq olar vıdeojoldaýda qazaqstandyq balalarǵa qoldaý bildirip, Mońǵolıadaǵy qandastardy Qazaqstan halqyn qoldaýǵa úndedi.
Birinshi oqýshy:
"Óziń ǵana oılaǵan,
Jamandyqtyń belgisi.
Ózgeni de oılaǵan,
Adamdyqtyń belgisi.
Ekinshi oqýshy:
Bir úı ash bolsa, bir aýyl ash. Bir aýyl ash bolsa, búkil el ash.
Úshinshi oqýshy:
Biz kúndelikti kerektenetin, tátti zattar satyp alatyn aqshamyzdy osy joly qazaqstandyq dostarymyzǵa jiberemiz.
Tórtinshi oqýshy:
Synybymyzdyń jáne muǵalimimizdiń atynan qazaqstandyq dostarymyzǵa 200 myń tógróg usynamyz.
Besinshi oqýshy:
Qazaqstan Respýblıkasynyń keıbir óńirlerinde sý tasqyny bolyp jatyr. Qazaq halqy – basyna is tússe, bir-birine kómektesetin baýyrmal jandar. Mońǵolıadaǵy barsha aǵaıyndy Qazaqstanǵa kómektesýge shaqyramyz.
