Qazaqstan Almatydaǵy tártipsizdikterge qyrǵyzstandyqtardyń qatystylyǵy týraly eshqandaı dálel tappady. Bul týraly Orda.kz saıty jazdy dep habarlaıdy Alash.kz.
«Prokýrordyń orynbasary Nurlan Aýǵanbaevpen áńgimelesý barysynda aǵymdaǵy jyldyń qańtarynda Qazaqstandaǵy jappaı tártipsizdikterge Qyrǵyzstan azamattarynyń qatysqany týraly derekter joq ekeni atap ótildi» dedi Qyrǵyzstan Ombýdsmendik keńsesiniń basqarma basshysy Asqat Azarbekov.
Ol Qyrǵyz Respýblıkasynyń kóptegen azamattary Qazaqstanǵa eńbek qyzmeti maqsatynda kelgenin jáne jaǵdaıdy turaqsyzdandyrýǵa qatysý maqsatymen emes, adamnyń qarapaıym qyzyǵýshylyǵynyń nátıjesinde oqıǵanyń qalyń ortasynda qalýy múmkin ekenin atap ótti.
«Sonymen qatar, biz eshbir jaǵdaıda óz azamattarymyzdy qylmysqa shynymen kináli bolsa, aqtaǵymyz kelmeıdi. Biraq olardyń tikeleı kinási nemese Qazaqstan zańnamasyn buzýǵa qatysy azaptaý arqyly emes, zańdy túrde dáleldenýi tıis» dedi Azarbekov.
Eske salsaq, buǵan deıin Qazaqstanda Almatyda qyrǵyz mýzykanty Vıkram Rýzahýnovty azaptaý faktisi boıynsha qylmystyq ister qozǵalǵany habarlanǵan bolatyn.
Qańtar oqıǵasy kezinde iz-túzsiz joǵalǵan Qyrǵyzstannyń taǵy bir azamaty – Cholponbek Sydyqov. Aıaǵy men qabyrǵasy synǵan ol 11 kúnnen keıin ǵana tabylǵan. Ol sondaı-aq qazaqstandyq tártip saqshylaryn azaptady dep aıyptady.
