Tiri bolsam, qazaqqa qyzmet etpeı qoımaımyn!

Álıhan Bókeıhan

Sýǵa ketken maldy úkimet qalaı tólep beredi?

22 sáýir 2024 275

Bıylǵy sý tasqynynan ólgen tórt túlik malǵa úkimet ótemaqy tóleıtin boldy.

Qabyldanyp jatqan sharalar nátıjesinde sý basqan jerlerden qaýipsiz ýchaskelerge 112,5 myń bas mal evakýasıalandy. Búgingi tańda 7035 bas rastalǵan, onyń basym bóligi - usaq mal.

Sý tasqynyna qarsy is-qımyl jónindegi respýblıkalyq shtabtyń hattamasymen ólgen maldyń qunyn óteý algorıtmi bekitildi. Bul algorıtmge sáıkes sý tasqyny saldarynan ólgen maldyń ıeleri ótemaqy alýǵa quqyly.

Menshik ıesi qalaı anyqtalady?

- janýardyń birdeılendirý nomerin (bırka, tańba jáne t.b.) aýyl sharýashylyǵy janýarlaryn birdeılendirý derekqorymen salystyrý jolymen;

- tirkelmegen jaǵdaıda kýágerlerdi tarta otyryp, zalaldy óteý jónindegi komısıanyń aktisimen.

Aýyl sharýashylyǵy janýarlarynyń ıelerine ótemaqy tóleý búdjet qarajatynan da, búdjetten tys kózderden de júrgizilmek.

"Ieleri jergilikti jerlerdegi zalaldy óteý jónindegi komısıaǵa ótinish jasaýǵa tıis. Komısıa múshelerine ótemaqy tóleý úshin qajet qujattar týraly nusqaý berildi. Barlyq ótinimdi jergilikti ákimdikter qurǵan resmı komısıalarǵa ǵana berý qajet. Tek osy jaǵdaıda ǵana ótemaqy tólenedi", – dedi Aýyl sharýashylyǵy mınıstrligi ókilderi.

Sý tasqyny boıynsha jaǵdaı turaqtalǵan óńirlerde ólgen mal ıelerine keltirilgen zalaldy óteý bastalyp ketken. Qaraǵandy oblysynda zalal tolyǵymen óteldi. Qostanaı oblysynda bul jumys bastalyp, búgingi tańda 268 mal basy boıynsha tólem júrgizildi.

Bul maqala týraly ne oılaısyz?