Búgin Q.Satybaldynyń soty boldy. Memlekettik aıyptaýshy J.Esebaev sottan Q.Satybaldyny 6 jylǵa sottaýdy, dúnıe-múlkin tárkileýdi, general-maıor sheninen, "Qurmet" jáne "Parasat" ordenderinen aıyryp, qaýipsizdigi ortasha kolonıaǵa jiberýdi surady.
Sot qansha jyl jaza kesetinin bilmeımiz, 6 jyl, bálkim, 5 jyl berer...
Bul az jaza ma? Múmkin. Qytaıda mundaı aıyppen, sóz joq, atý jazasyna keser edi. Zańnyń tiline emes, qarapaıym halyqtyń tiline salsań, "atý kerek" der. Alaıda bizde zań basqa, onyń ústine shyǵynnyń ótelýi, aıyptalýshynyń kinásin tolyq moıyndaýy jáne prosesýaldyq, medıatıvtik kelisim jasalǵany jazany birshama jeńildetýi múmkin.
Biraq alda jáne bir sot prosesi bar ekenin umytpaıyq. Ol – Qańtar búligine qatysty. Eger Q.Satybaldynyń búlikke qatysy bar ekeni dáleldense, jazasy jeńil bolmaıtyny anyq. Bul sot jabyq ótetin sıaqty, óıtkeni "memlekettik qupıa" degen bar. Solaı bolsa, onda tek sot úkimin ǵana estımiz...
Bul onyń sońǵy soty emes. Áli talaı bylyǵy áshkere bolady. Jazanyń ústine jaza jamalady. Nazarbaev áýletiniń jańa qylmystary jarıa bolǵan saıyn Satybaldy da qıpaqtaı bastaıdy. Tamyryn tereńge jibergen júıeni byrt-byrt úzý úshin de biraz ýaqyt kerek.
Jańa Qazaqstannyń qabyrǵasyn qalap jatqandar eski júıeniń eń qaýipti ókiline keńshilik tanyta qoımas. Satybaldy bastaǵan sabazdardyń sazaıyn berý saıası reformanyń bir tarmaǵy ispetti dúnıe. Áliptiń artyn baǵaıyq. Ana kisiniń tóńiregine toptasqandardy álsiretý saıası reformany sátti júrgizýge kepil bolady.
