Tiri bolsam, qazaqqa qyzmet etpeı qoımaımyn!

Álıhan Bókeıhan

SHQO "Nazarbaev rezıdensıasyn" ne úshin satqaly jatyr?

21 maýsym 2024 290

Shyǵys Qazaqstan oblysy ákimdigi resmı túrde "Sol jaǵalaý profılaktorııi" dep atalatyn nysandy 1 mlrd 115 mıllıon teńgege saýdaǵa shyǵardy. Shart boıynsha keshendi bolashaq ıesi úsh jyl senimgerlik basqarýǵa alady. Keıin tolyq satyp alýǵa quqyly, - dep habarlaıdy Alash.kz Dalanews.kzke siltep.

Oblys ákimdiginiń aqparaty boıynsha ýaqytsha ıelikke alatyn adam birinshi jyly 400 mln teńge, keıingi eki jylda 200 mln teńgeden ınvestısıa quıýy shart. Investor ǵımarattarǵa kúrdeli jóndeý júrgizip, nysandy konferens-zaly, jeke kovorkıngter, qonaq úı nómirleri, sport alańdary jáne saýda pavılondary bar kópbeıindi ortalyqqa aınaldyrýǵa mindetti. Bir sózben aıtqanda, bul jer "týrısik-ınvestısıalyq hab" bolýǵa tıis dep jazylǵan aqparatta. Buǵan qosa keminde 25 adamdy jumyspen qamtý talaby da bar.

Jergilikti "ÝK-nús" saıtynyń málimetinshe, burynǵy prezıdent Nursultan Nazarbaev Shyǵys Qazaqstanǵa saparlap kelgeninde osynda toqtap júrýi múmkin. Keıingi jyldary blogerler bul jer oblystyń burynǵy ákimi Danıal Ahmetovtiń "jeke demalys orynyna aınaldy" dep te dabyl qaqqanyn jazady basylym. Biraq muny Ahmetovtiń ózi joqqa shyǵaryp, nysanda balalar demalady degen.

Bul jerdi Arbat media basylymy da "Nazarbaev rezıdensıasy" dep ataıdy. Al "Ratel" saıty "prezıdent rezıdensıasy" deıdi. Alaıda oblys ákimdigi nysan "prezıdent rezıdensıasy" emes, "Sol jaǵalaý profılaktorııi" dep málimdegen deıdi Azattyq.

Al shyn máninde bul "saýyqtyrý keshenine" kimder barǵanyn táýelsiz derekter arqyly anyqtaý múmkin emes. 2022 jyly Shyǵys Qazaqstan oblysy ákimdigi atalmysh nysanǵa aeromassaj, gıdromassajy bar SPA-basseın salý jóninde tender jarıalaǵan bolatyn. Bul bastama qoǵam belsendileri tarapynan synǵa qalǵan. Jýrnalıs Denıs Danılevskıı sol jyly nysandy halyqty emdeıtin shıpajaıǵa aınaldyrý jóninde talap qoıyp, oblys ákimdigine hat joldaǵan. Biraq onyń talaby oryndalǵan joq.

2022 jylǵy Qańtar oqıǵasynan keıin Qazaqstanda "prezıdent rezıdensıasy" dep atalyp kelgen nysandar qoǵam ıeligine berile bastady. Máselen, prezıdent Qasym-Jomart Toqaev byltyr Qostanaı, Aqtaý, Taraz, Atyraý jáne Aqtóbedegi rezıdensıalaryn balabaqsha nemese balalar lagerine aınaldyrýdy tapsyrǵan.

Bul maqala týraly ne oılaısyz?