Ǵylym jáne joǵary bilim mınıstri Saıasat Nurbek «Bolashaq» baǵdarlamasy qatysty janjalǵa pikir bildirdi. Bul týraly Alash.kz Kursiv.media saıtyna silteme jasap.
Buǵan deıin Natalá Vorobeva men Maqpal Dáribaeva Prezıdentke úndeý joldaǵan edi. Olar «Bolashaq» halyqaralyq baǵdarlamasy boıynsha oqyp, artynsha oqýyn tastap ketken stıpendıat Valerıa Gavrılenkoǵa kepilger bolǵan. Shaǵymdanýshylar stıpendıat kesirinen baspanasyz qalý qaýipi týyndaǵanyn aıtady.
2019 jyly Valerıa Gavrılenko «Bolashaq» ortalyǵynyń qyzmetkerlerimen sóz baılasyp, 2 páterdi kepilden zańsyz shyǵaryp satyp jibergen. Sodan keıin Ulybrıtanıaǵa qonys aýdarǵan. Endi «Bolashaq» ortalyǵy eki jýrnalısen oqýdyń aqshasyn qaıtarýdy talap etýde. Iaǵnı kepilger bolǵan qos jýrnalıs shamamen 30 mln teńge aqsha tóleýge májbúr.
«Bolashaq» ortalyǵyndaǵy daýǵa baılanysty Ǵylym jáne joǵary bilim mınıstri Saıasat Nurbek túsinikteme jasap, máseleniń qalaı sheshilip jatqanyn baıandap berdi.
«Zań boıynsha eki kepilger-Vorobev pen Dáribaeva-ortaq jaýapkershilikte. Iaǵnı olar kelisimge qol qoıý arqyly bul jaýapkershilikti óz erkimen aldy. Biz jaǵdaıdyń ádiletsiz ekenin túsinemiz. 2-3 kún buryn Gavrılenko tolyq óz kinásin moıyndap, eki jaqty kelisimshartqa qol qoıyldy. Sol kelisimsharttyń arqasynda ol búkil aqshany qaıtaramyn dep ózine mindet aldy. Endi jaýapty tulǵalarǵa da Bas prokýratýra arqyly tıisti zańnama aıasynda máselesin bastap kettik», – dedi mınıstr Senat kýlýarynda.
Mınıstr másele zań aıasynda sheshiletinin, kepil ıelerine talap qoıylmaıtynyn aıtty. Gavrılenko bolsa aqshany tóleýdi bastaǵan.
«Sondaı-aq jaýap berýshi 3 tarapqa shaǵym túsirýge májbúr boldyq. Sebebi zań aıasynda olar da jaýapty. Osylaı isteýge májbúr boldyq. Gavrılenko barlyq aqshany tólese, garant ıelerine shaǵym bolmaıdy. Meniń oıymsha, olarǵa durys keńes berilmegen. Olar qaýipti sezip, zalaldy tolyq óteımiz dep oılanǵan. Búginde barlyq shaǵym Valerıa Gavrılenkoǵa qatysty bolady», – dedi vedomstvo basshysy.
Sonymen qatar mınıstr «Bolashaq» halyqaralyq baǵdarlamalar ortalyǵynyń burynǵy basshylary men qyzmetkerlerin jaýapkershilikke tartý boıynsha sharalardy jedeldetý maqsatynda Bas prokýrorǵa hat joldaǵanyn aıtty.
Shaǵymdanýshylardyń aıtýyna qaraǵanda, bul zańsyzdyq «Bolashaq» halyqaralyq baǵdarlamalar ortalyǵynyń prezıdenti Janbolat Meldeshovtiń kezinde bolǵan. Ol ortalyqty 2016 jyldyń qyrkúıegi men 2019 jyldyń tamyzyna deıin basqarǵan.
«Halyqaralyq baǵdarlamalar ortalyǵy» AQ baspasóz qyzmeti bul jaǵdaıǵa qatysty málimdeme jasap, shetelde zańsyz júrgen stıpendıattarǵa qatysty aýqymdy tekseris júrip jatqanyn habarlady.
«Shetelde kadrlar daıarlaý jónindegi respýblıkalyq komısıanyń 2015 jylǵy 14 jeltoqsandaǵy No 34-4.10 sheshimi negizinde Gavrılenko V.V. Ulybrıtanıanyń Lıverpýl ýnıversıtetinde «Strategıalyq komýnıkasıa» mamandyǵyna magıstratýra baǵdarlamasy boıynsha oqý úshin QR Prezıdentiniń «Bolashaq» halyqaralyq stıpendıasynyń ıegeri atandy, 2016-2017 oqý jylynda akademıalyq oqýdan ótti. Jasalǵan kelisimsharttyń talaptaryna sáıkes, stıpendıat oqýyn aıaqtaǵannan keıin dıplomyn tapsyrý, oqýyn aıaqtaǵannan keıin Qazaqstan Respýblıkasyna oralý jáne Qazaqstan Respýblıkasy aýmaǵynda mamandyǵy boıynsha jumys isteý mindettemelerin aldy»,- delingen habarlamada.
Ortalyqtyń habarlaýynsha, kelisimshart aıasynda stıpendıat oqý qunynyń jalpy somasynan kem emes baǵalanatyn jyljymaıtyn múlikti kepilge qoıýǵa mindetti. Kepilge qoıylǵan jyljymaıtyn múlik akademıalyq oqýdyń jalpy qunyn ótemegen jaǵdaıda, qamtamasyz etilmegen qalǵan soma boıynsha stıpendıat oqýyn aıaqtaǵannan keıin mindettemelerdi qamtamasyz etetin jumysqa qabiletti kepilgerlerdi usynady.
Gavrılenko eki jyljymaıtyn múlik nysanyn kepil retinde usynǵan. Alaıda olardyń quny oqý qunyn tolyq ótemegendikten, stıpendıat úshin resmı túrde eki «kepilger» – M.A.Darıbaeva, N.A. Vorobeva kepildik berdi, olardyń árqaısymen Ortalyq kepildik sharttaryn jasasqan.
«Kepildik shartynyń 2.1 jáne 2.2 tarmaqtaryna sáıkes M.A.Darıbaeva men N.A. Vorobeva oqýdy uıymdastyrý sharty boıynsha barlyq mindettemeni tolyq oryndaýǵa birlesip jaýapkershilikti moınyna alǵan. Sonymen qatar kepildik shartynyń 2.4 tarmaǵyna sáıkes, stıpendıattyń Ortalyq aldyndaǵy mindettemelerin oryndamaýy nemese tıisti túrde oryndamaýy jaǵdaıynda mindettemelerdi oryndaý týraly talapty qanaǵattandyrmaǵan jaǵdaıda, Ortalyq oryndalmaǵan bóliktegi atalǵan talapty kepilgerge qoıýǵa quqyly», – delingen Ortalyq málimdemesinde.
