Tiri bolsam, qazaqqa qyzmet etpeı qoımaımyn!

Álıhan Bókeıhan

"Saparbaevtyń úsh qabatty kotedj salyp beremin degeni aıaqsyz qaldy". 24 bala asyrap alǵan aqtóbelikti kim aldady?

02 aqpan 2024 57

Ómirhan Jetesov qurylys materıaldaryn ákelip berýge ýáde etken turǵynnan 2 mıllıon teńgesin qaıtara almaı júr. Aqtóbelik krli-zaıypty Ómirhan men Amangúl óńir jurtyna jaqsy tanys. Olar ózderiniń 4 perzentinen bólek ata-ana qamqorlyǵynsyz qalǵan 24 balany baýyrlaryna basyp, tálim-tárbıe berip otyr. Olardyń altaýy úlken shańyraqqa byltyr ǵana kelgen dep jazady inbusiness.kz.





Qyzyǵy – sol balalardyń biri Ómirhannyń bólesiniń nemeresi bolyp shyqqan. Taǵdyr qalaýymen jetimder úıine túskenin ol keıin bilgen. Balalardyń aldy aıaqtanyp úlgerse, kenjeleri balabaqshada. Halyq Ómirhan men Amangúldi ónerli jup retinde de jaqsy biledi. Otbasylyq "Shashý" ansambli  ár túrli saqynalarda óner kórsetip júr.

Tipti, jýyrda jeke konsertterin de bergen. Otaǵasy balalarynyń bolashaǵy úshin eshteńeden aıanbaıtynyn aıtady. Eshkimnen kómek te kútken emes. Byltyr "Ul-qyzdarym sportpen de shuǵyldansyn, asyr-salyp oınasyn" degen nıetpen óz kúshterimen úılerine japsarlas sport zaldyń qurylysyn bastaǵan edi. Alaıda, qol ushyn sozyp, qurylys materıaldaryn ákelip beremin degen bireý aldap soqqan. Ómirhan Jetesov ol adamnyń jeke málimetterin jarıa etpedi. Áli qatesin túsinip, qarjyny tolyq ákelip berer degen úmitte.
"Men kásipkerlerden kómek surap, eldi aralap shyqsam, áldeqashan baıyp ketetin edim. Biraq ondaı áreketke barmaımyn. Balalardy ózim úshin asyrap otyrmyn. Biraq qol ushyn sozamyn degenderdiń betin qaıtarǵan emespin. Myna sport zaldy da nesıe alyp salyp jatyrmyn. Qaryzǵa kirdik. Keshe balalarymdy úıirmelerine, mektepterine tasyp júrgen kóligimniń motory ketip qaldy. Ol da jyǵylǵanǵa judyryq bolyp otyr. Bizge qatty batyp otyrǵany –  uldarym men qyzdarym úshin salyp jatqan sport zal qurylysynyń toqtap qalǵany. Biz ol jigitti áli sotqa bere qoıǵan joqpyz. Áıeli men anasy jylap, keshirim surap keldi. Ol adamnyń biz sekildi otbasyny aldaýǵa qalaı dáti barǵanyn túsine almadym",  - deıdi ol.

Jetesovter qazir qala ishindegi jeke úıde turady.Bul baspanany da óz kúshterimen birneshe márte úlkeıtken. Jergilikti bılik ókilderiniń de kómektesemiz degen ýádeleri jelge ushypty.
"Jatqan jeri jaıly bolsyn, Saparbaev aǵamyz da keremet adam ǵoı. Biraq, ol kisi ákimdikten ketkennen keıin úsh qabatty kotedj salyp beremin degen sózi aıaqsyz qalyp qoıdy. Keshegide osyndaǵylar avtobýs beremiz dedi. Balalarym qatty qýanyp edi. Ol da oryndalmady. Men adamdarǵa aıtamyn, "Balalarǵa ýáde bermeńizder. Ýáde berseńizder, oryndańyzdar",- deımin.  Óıtkeni, men balalardy eshqashan aldamaımyn. Balaǵa ótirik aıtsań, ekinshi saǵan senbeıdi", - deıdi kóp balaly áke.

Amangúl men Ómirhan balalarynyń bolashaǵyna úlken senimmen qaraıdy.
"Baǵyp-qaqqan perzentterimiz adal azamat bolyp ósse, basqa armanymyz bolmas edi", - deıdi.

Olar keń úıge kóshse, taǵy da taǵdyr teperishin kórgen jetim balalardy asyrap alýǵa ket ári emes.

Bul maqala týraly ne oılaısyz?