Tiri bolsam, qazaqqa qyzmet etpeı qoımaımyn!

Álıhan Bókeıhan

Resmı qujatty talap etpegen: Bıshimbaev pen Núkenovanyń nekesin qıǵan ımam jazalandy

18 sáýir 2024 308

Qazaqstan musylmandar dinı basqarmasynyń ókili Qýandyq Bıshimbaev pen Saltanat Núkenovanyń nekesine qatysty málimdeme jasady.

Qazaqstan musylmandary dinı basqarmasynyń Jarǵysyna sáıkes QMDB-nyń resmı dinı qyzmetkerleri Qazaqstan Respýblıkasynyń qoldanystaǵy zańnamasy aıasynda jumys isteıdi.

"Neke (erli-zaıyptylyq) jáne otbasy týraly" 2011 jylǵy 26 jeltoqsandaǵy Qazaqstan Respýblıkasy Kodeksiniń 2-babynyń 3-tarmaǵynda tek memlekettik organdar qıǵan neke (erli-zaıyptylyq) ǵana moıyndalatyny belgilengen.

Osyǵan oraı QMDB-nyń ishki jumys tártibiniń tıisti talabyna sáıkes meshit qyzmetkerleri neke qıý rásimi aldynda bolashaq erli-zaıyptylardan Azamattyq hal aktilerin tirkeý (AHAT) bólimine tirkelgenin rastaıtyn kýálikti talap etedi.

2022 jyldyń 17 qazanynda Astana qalasyndaǵy Respýblıkalyq bas meshitte Qýandyq Bıshimbaev pen Saltanat Núkenovanyń óz ótinishteri boıynsha kýágerlerdiń qatysýymen bolashaq erli-zaıyptylardyń nekesi qıylǵan. Ekeýinen jáne olardyń týystarynan AHAT bólimine tirkelgenin rastaıtyn kýálik talap etilgende «jasalý ústinde» dep jaýap bergen. Sonymen qatar dástúrge saı eki jaqtyń ata-analarynyń batasy men ruqsatyn alǵanyn, salt-dástúr jolymen nekelerin qıyp berýin ótingen.

Bıshimbaev pen Núkenovadan AHAT bólimine tirkelgenin rastaıtyn kýálikti tabandy túrde talap etpegen, ıaǵnı QMDB-nyń ishki jumys tártibin buzǵan Respýblıkalyq bas meshit ımamy Q.Qydyrmınge tártiptik shara qoldanylyp, eskertý jasaldy.

"Qazaqstan musylmandary dinı basqarmasy AHAT bóliminde resmı tirkelmegen, dinimiz ben dástúrimizge qaıshy keletin «azamattyq nekemen» úılenýdiń sharıǵattaǵy úkimi haram ekenin taǵy da habarlaıdy. QMDB Qazaqstan azamattaryn arty opyq jegizetin mundaı aýyr ári las kúnáli isterden aýlaq bolýǵa shaqyrady", - delingen habarlamada.

Bul maqala týraly ne oılaısyz?