Tiri bolsam, qazaqqa qyzmet etpeı qoımaımyn!

Álıhan Bókeıhan

Qulybaev shyn máninde eshteńe qaıtarylyp jatqan joq - Ákejan Qajygeldın

20 mamyr 2024 319

Belgili saıasatker Ákejan Qajygeldın Jusan bank pen Nazarbaev qorynyń baılanysy týraly jáne bankke memleketten quıylǵan mıllıardtar týraly aıtty, - dep jazdy Alash.kz.

«Tımýr Qulybaev 150-200 sısterna qaıtardy» dep jarysa aıtady da, bári «oo, aqyry aktıvter qaıtaryla bastady ǵoı» dep oılaıdy. Al shyn máninde eshteńe qaıtarylyp jatqan joq. Ol (Qulybaev) saýdasyn baıaǵydaı júrgizip júr. Gaz Qara teńizge burynǵydaı tasymaldanyp jatyr. Elde gazǵa qatystynyń bárine bir áýletpen baılanysty ekenin bilemiz. Arasynda oryndary aýysyp qana turady. Sháripbaev kelse sol aınalysady,  Boranbaev bolsa sol aınalysady – bári bir áýlettiń qolynda. Birde-bir aýdıt júrgizbeı ne bolǵanyn túsindire almaımyz», - deıdi Dalanews.kz Ákejan Qajygeldın Elmedia-ǵa bergen suhbatyna silteme jasap.

Qajygeldın Jusan bank pen Nazarbaev qorynyń baılanysy týraly aıtty.

«Jusan bank ıesi Nevadada. Onyń qaltasyna aspannan dolbarlap aıtqanda 1,2 mıllıard aktıv tústi. Bul óte kóp aqsha. Bireý olarǵa bul aqshany berdi. Kim ekenin de bilemiz. Biraq muny Qazaqstan bıligi ózi málimdep aıtqanyn qalaımyz. Tergeý júrgizip, aqsha qaıdan túskenin aıtýy kerek. 1,2 mıllıard bir jerden kelse, demek ol aqsha bir jerden shyqty ǵoı? Biz bul Nazarbaev qorynan túsken aqsha dep oılaımyz. Al qordaǵa aqsha Nazarbaevtyń qarjysy emes, ol memlekettiń aqshasy. Sebebi onyń barlyq kitabyn satqannyń ózinde ary ketse úsh mıllıon jınalady. Biraq 1,2 mıllıard emes», - deıdi Qajygeldın.

Al Májilis depýtaty Ermurat Bapıdiń sózinshe, Nazarbaev qorymen, Jusan bank-pen Qazaqstan úkimeti jumys istep jatyr.

«Maǵan jetken aqparattar boıynsha jáne memlekettik organdardyń túsindirýi boıynsha, Nazarbaev qorymen, Jusan bank-pen Qazaqstan úkimeti jumys istep jatyr. Ol jóninde qoǵamǵa aqparat berilmeıdi. Ol qalaı istep jatyr? Qandaı maqsatta, qandaı negizde jumys istep jatqanyn biz bilmeımiz. Biraq mendegi aqparat boıynsha Qazaqstan úkimeti Jusan bank-qa óz erkimen kelisimder men belgili mólsherde aktıvterdi qaıtarý máselesi jóninde áńgime bolyp jatyr. Biraq onyń naqty tetikterin bilmeımin», - deıdi Ermurat Bapı Elmedia-ǵa bergen suhbatynda.

Depýtat májilistiń kúzgi sesıasy bastalǵan kezde birneshe depýtat Bas prokýratýraǵa saýal joldap, aktıvterdi qaıtarý zańynyń oryndalý barysy jóninde qandaı jumystar atqarylǵany týraly esep suraıtynyn aıtty.

«Eger ony qoǵamǵa estýge bolmasa tym quryǵanda depýtattardyń aldynda jabyq túrde esep berse degen usynyspen shyǵamyz. Sebebi biz zańdy qabyldaımyz, óndiriske beremiz, biraq zańnyń oryndalý barysyn baqylaı almaımyz. Bul nonsens qoı! Al biz qabyldap bergen zańdy tıisti memlekettik organdar óziniń yńǵaıyna qaraı buryp alady. Bul da bizdiń qoǵamdaǵy zańnama máselesindegi problema», - deıdi depýtat.

Sonymen qatar, depýtat Tımýr Qulybaevtyń Germanıadaǵy aktıvteri týraly aıtty.

«Qarap otyrsaq, Qulybaev aktıvterdi jyljymaıtyn múlik kóleminde qaıtaryp jatyr. Al Qulybaevtyń munaı aktıvteri jóninde áńgime joq. Ol jaqqa áli barǵan da joqpyz. ALMEKS arqyly qanshalyq munaı salasynda aktıvi bar, ony qaıtarý kerek, biraq ol jaıly áńgime joq. Biz muny kóterdik, biraq bılik tarapynan naqty jaýap joq. Qarabaıyr jaýappen bizdi aldaıdy», - deıdi Ermurat Bapı.

Aıta keteıik, buǵan deıin Ákejan Qajygeldın Nazarbaevtyń kúıeýbalasy Tımýr Qulybaevtyń Qazaqstandaǵy memlekettik organdaryndaǵy yqpaly, Samat Ábish isi men eldegi júıe týraly aıtqan bolatyn. Qajygeldınniń sózinshe, Tımýr Qulybaevtyń memlekettik organdardyń sheshimderine áseri prokýratýranyń, zańdardyń, Májilistiń, Úkimet pen Prezıdent Ákimshiliginiń yqpalynan kúshtirek. Ol Qulybaevtan qutylý úshin barlyq zańdardy qaıta qaraýymyz keregin aıtqan edi.

Bul maqala týraly ne oılaısyz?