Qorǵas kedenindegi bylyq-shylyqtyń shýy qaıtadan ekpin alǵan sıaqty. QazTAG aqparat kóziniń deregine qaraǵanda, eks-senator ári eks-bas prokýror Qaırat Qojamjarovtyń qaramaǵynda qyzmet etken taǵy bir kúdikti ustalǵan.
«8 qańtar Sybaılas jemqorlyqqa qarsy is-qımyl agenttiginiń Almaty qalalyq departamentiniń burynǵy qyzmetkeri Kenjebaı Jumabekov ustaldy. Ol «Qorǵas isi» boıynsha qatysýshy ári oryndaýshy bolǵan», – dep habarlaǵan aqparat kózi.
Aqparat jetkizýshiniń dereginshe, Jumabekov – qarjy polısıasynyń burynǵy agenti, qazir Qańtar isi boıynsha tergelip jatqan Talǵat Mahatovtyń («Beton») jaqyn dosy.
Ótken jyldyń sońynda qarjy polısıasynyń taǵy bir burynǵy qyzmetkeri Ulan Mádıev ustalǵan bolatyn. Onyń aty-jóni «Qorǵas isi» boıynsha kúdikti dep tanylǵan qyzdardyń zorlanýyna baılanysty aıtylady.
«Sondaı-aq bul iste U.Mádıevten bólek, qarjy polısıasynyń burynǵy shendisi ári Qojamjarovtyń «serigi» Talǵat Tatýbaevtyń jáne qarjy polısıasynyń Almaty oblysy boıynsha departamentiniń burynǵy bastyǵy Sergeı Potanınniń aty-jónderi bar. Mádıev, Tatýbaev, Dúısenovter Qorǵastaǵy kontrabandadan paıda kórgender retinde atalsa, al Qojamjarov bul qylmystyq júıedegi eń basty paıda kórýshi retinde atalǵan», – dep jazdy QazTAG.
Burynyraqta Naýryzbaı aýdanynyń burynǵy prokýrory Vıktor Tıhonov «Qorǵas isi» boıynsha negizgi kýágerdiń atyshýly ólimine Qojamjarovtyń adamdarynyń qatysy bolýy múmkin ekenin aıtqan bolatyn.
Budan birneshe jyl buryn eldi dúrliktirgen «Qorǵas isi» qaıtadan ekpin ala bastaǵandaı. Jáne de bul istiń túıini Qojamjarovqa jaqyndap qalǵandaı kórinedi...
