Tiri bolsam, qazaqqa qyzmet etpeı qoımaımyn!

Álıhan Bókeıhan

Qyzdarǵa qol júgirtedi: Túrkistan oblysynda sottalǵan azamat mektepte sabaq bergen

24 mamyr 2024 279

Túrkistan oblysy Qarasý aýylynyń oqýshylary mekteptegi dene shynyqtyrý páni muǵaliminiń ústinen shaǵym túsirdi. Aıtýlarynsha, buryn sottalǵan pedagog joǵary synyptyń qyzdaryna qol júgirtip, tıisip, uldardy uratyn kórinedi.

Bul týraly Alash.kz saıty 31-arnanyń Informbúro jańalyqtar baǵdarlamasyna silteme jasap habarlaıdy.

“Altaı aǵaı dene shynyqtyrý sabaǵynda bizge tıisip, azǵyndaıdy. Qushaqtap, aıaǵymyzdan ustaıdy, sıpalaıdy. Biz ata-anamyzǵa aıtýǵa qorqamyz. Qushaqtaıdy, ásirese, 9-10-synyptyń qyzdaryna tıisedi. Aldyńnan shyǵyp, “meniń aldyma kel” deıdi. Keıbirin buryshqa tyǵyp qoıady. Solarmen sóılesip turady”, – dedi oqýshy qyz.

Muǵaliminiń mundaı áreketin estigen oqýshynyń anasy qyzyn birden basqa mektepke aýystyrypty. Polısıaǵa da aryz jazǵan kelinshek jaǵdaıdy sońyna deıin aparýǵa nıetti.

“Endi aryzdanamyn. Buǵan deıin bilmeı keldim. Bilsem, birden polısıaǵa júginetin edim. Jumystan shyǵartar edim”, – dedi ata-ana Shahısta Jalmurzaeva.

Oqýshylardan bólek onyń áriptesteri de muǵalimniń boqtyq sózder aıtatynyn málimdedi. Ol jaqynda ornynan bosatylǵan dırektordyń kúıeýi eken.

Qyzdarǵa qol júgirtken muǵalim uldarǵa judyryq jumsaıdy deıdi. Byltyr keýde tusynan soqqy alǵan 9-synyp oqýshysy medısınalyq kómekke júgingen kórinedi. Anyqtamasy da bar, biraq oqıǵa jyly jabylǵan.

Al muǵalimniń oqýshyǵa qol kótergeni týraly derek 2023 jyldyń 10 sáýirinde bolǵan. Saıram aýdanynyń prokýrory Dáýlet Tilemisovtyń aıtýynsha, qazir atalǵan derek boıynsha qylmystyq kodekstiń 140-baby 2-bóligimen “Kámeletke tolmaǵan adamdy tárbıeleý jónindegi mindetterdi oryndamaý” boıynsha sotqa deıingi tergep-tekserý bastaldy. 

“Ol buryn 3 jyl 6 aıǵa sottalǵan. Sondyqtan bul kisige qanshalyqty jumys isteýge bolatyn-bolmaıtynyn quzyrly organdar sheshetin shyǵar. Óıtkeni sot solaı shyǵaryp bergen eken”, – dedi M.Saparbaev atyndaǵy jalpy orta mektep dırektorynyń orynbasary Marjan Berdimuratova.

Muǵalim mamyrda ornynan bosatylǵan dırektordyń kúıeýi eken. Áıeliniń qyzmetin paıdalanyp, ózge muǵalimderdi saǵatynan aıyramyn dep qorqytypty.

“Aıqaılap, boqtap, qoqan-loqqy kórsetti. “Nege sen shaǵymdanasyń” dep bas salyp, mekteptiń aldynda janjal shyǵardy”, – dedi M.Saparbaev atyndaǵy jalpy orta mekteptiń muǵalimi Ulyqbek Gúlbaev.

Dene shynyqtyrý pániniń muǵalimi aqysyz eńbek demalysyna shyǵyp ketken eken. Muǵalimniń buryn jasaǵan qylmysy balalarǵa qatysty bolmaǵandyqtan, jumys isteý máselesine kedergi keltirmeıdi deıdi prokýrorlar. 

Bul maqala týraly ne oılaısyz?