Tiri bolsam, qazaqqa qyzmet etpeı qoımaımyn!

Álıhan Bókeıhan

"Qazaqstanda jastar baspana alý úshin shetelde jumys isteýge májbúr, sonda qalǵandar kóp " - depýtat Muqaev

15 mamyr 2024 590

Depýtat Dáýlet Muqaev májilis minberinde jastarǵa arnalǵan jaldamaly páter máskelesine toqtaldy. Jastardyń páter alý úshin shetke shyǵyp ketkenin aıtyp,  Premer-Mınıstrdiń orynbasary Qanat Bozymbaevqa depýtattyq saýal joldady, dep habarlaıdy Alash.KZ ulttyq portaly inbusiness.kz saıtyna siltep.

Depýtat Dáýlet Muqaev deregine sensek, 2019 jyldan beri Astana, Almaty, Shymkent qalalarynda jaldamaly páterge ornyqqan jastardyń sany 10 myńǵa jýyqtady.

"2019 jyly baspana alǵan jastardyń baspanany bosatýyna da az ýaqyt qaldy. Búginde megapolısterdegi jastardyń dalada qalý qaýpi joǵary. Ekinshi taǵy bir másele – jyl saıyn berilýi kerek jaldamaly páterler Almaty qalasynyń jastaryna áli de berilmedi. Naqty tizim, nátıjesi shyqpady. Jaldamaly páter alǵan jastardyń qarjy jınap, óz baspanalaryn ala almaýdyń da ózindik sebepteri de bar. 2019 jyldan beri ınflásıa deńgeıi de sharyqtap, úı baǵasy jyldan jylǵa ósti. Osydan 5 jyl buryn respýblıka boıynsha páterdiń ortasha sharshy metri 200 myń teńge bolsa, qazir 400 myń teńgege jýyqtady. Iaǵnı, 2 ese ósti. Shyndyqqa týra qarasaq, baspanaǵa qarjy jınaýdan, qymbatshylyq qyspaqqa alyp kúnkóris máseleli aldyńǵy orynǵa shyqty", - dedi Dáýlet Muqaev.

Depýtat elimizde jastarǵa arnalǵan tıimdi memlekettik baǵdarlama joq ekenin basa aıtty. Saldarynan jastar baspanany alý úshin shetel asyp, jumys isteýge májbúr, dep jalǵastyrdy ol.

"Kelmeı qalyp qoıyp jatqany qanshama. Bul elimizde daryndy, talantty jastardyń azaıýyna alyp kelip otyr. Úshinshiden, jaldamaly páter alǵan jastar ózge de memlekettik baǵdarlamalar men úı kezeginde turý múmkindiginen aıyrylǵan. Aqshasyn jınap, túıip otyrǵan jastar, basqa baǵdarlamaǵa qatysa almasa qalaı baspanaly bolmaq", - dep atap ótti halyq qalaýlysy.

Májilis depýtaty osyǵan baılanysty jastardyń tıimdi baspana alýyna jaǵdaı jasaýdy, kemi 10%-dyq bastapqy jarnamen ózderi turyp jatqan baspanasyn satyp alýǵa múmkindik berý máselelesin qarastyrýdy qaıta surady. Onyń aıtýynsha, paıyzdyq mólsherleme 5%-dan aspaýy tıis nemese jaldamaly páterde turý merzimin uzartý kerek.

Bul maqala týraly ne oılaısyz?