QR Energetıka mınıstri Bolat Aqsholaqov elimizdiń 2035 jylǵa deıingi energetıkalyq balansynda qýaty 2,4 gıgavatt bolatyn AES salý josparlanǵanyn aıtty.
Onyń aıtýynsha, elimizdiń energetıkalyq balansynda bazalyq generasıanyń jańa kózi retinde belgilengen qýattylyǵy 2,4 gıgavatt bolatyn atom elektr stansıasy qarastyrylǵan, al energetıkalyq teńgerim 2035 jylǵa deıin eseptelgen.
«Ázirlengen energetıkalyq balansqa sáıkes, 2035 jylǵa qaraı elektr energıasyn tutyný shamamen 153 mlrd kılovatt-saǵatty quraıdy. Sonymen qatar, qazirgi ýaqytta jumys istep turǵan energıa kózderiniń óndirisi birqatar obektıvti sebepterge baılanysty tómendeıdi. Shamamen 89 mlrd kılovatt-saǵatty quraıdy. Qoldanystaǵy qýat kózderi halyqtyń jáne ekonomıkanyń elektr energıasyna boljamdy qajettiligin óteı almaıdy» dep túsindirdi Energetıka mınıstri.
Ol osyǵan baılanysty 2035 jylǵa qaraı jalpy qýattylyǵy 17,5 gıgavatt bolatyn jańa generasıalaýshy qýattardy iske qosýdy qamtamasyz etý kerektigin atap ótti.
Mınıstrliktiń Elektr energetıkasyn damytý departamentiniń dırektory Aıdos Dáribaev Qazaqstandaǵy atom elektr stansıalary arqyly energıanyń qandaı úlesin óndirýdi josparlap otyrǵany týraly da aıtty.
Qazaqstanda atom elektr stansasyn salý múmkindigi týraly másele 2021 jyldyń jazynda belsendi túrde talqylana bastady.
Byltyr kúzde Qazaqstanda elektr energıasy tapshylyǵy baıqaldy: Shyǵys Qazaqstan oblysynda elektr qýaty shekteldi, al Shymkentte olar úzilisterge shaǵymdana bastady.
4 qarashada «KEGOC» AQ Qazaqstanda elektr qýatyn tutynýdyń qalyptan tys artqanyn habarlady, bul onyń tapshylyǵyna ákeldi.
Osy kezeńde prezıdent Qasym-Jomart Toqaev eldegi atom energetıkasyn damytý perspektıvalaryna, sonyń ishinde AES qurylysyna qatysty pikir bildirdi.
2022 jyldyń 8 aqpanynda «Samuryq-Qazyna» UÁQ» AQ basqarma tóraǵasy Almasadam Sátqalıev elimizdiń ońtústigindegi atom elektr stansıalary qurylysynyń tıimdiligin málimdedi.
Memleket basshysy óz kezeginde taza atom energıasy bolmasa, ınvestısıany aıtpaǵanda, búkil ekonomıkamyzdan aıyrylamyz degen pikir bildirdi.
Derekkóz
