Memleket basshysy AQSH senatory Stıv Deınsti qabyldady, dep habarlady Aqordanyń baspasóz qyzmeti.
Prezıdent Qasym-Jomart Toqaev AQSH Senatynyń múshesi Stıv Deınske iltıpat bildire otyryp, Qazaqstan men Amerıkanyń yntymaqtastyǵy dástúrli túrde qarqyndy damyp kele jatqanyn atap ótti. Sonymen qatar ekijaqty qarym-qatynasta parlamenttik dıplomatıa mańyzdy ról atqaratynyn aıtty.
Kezdesý barysynda saýda-ekonomıkalyq yqpaldastyq máseleleri qarastyryldy. Qazaqstan prezıdenti elimizde ınvestısıa tartý, ekonomıkany yryqtandyrý jáne ónerkásipti damytý isine erekshe nazar aýdarylyp otyrǵanyn málimdedi.
Qasym-Jomart Toqaevtyń aıtýynsha, energetıka, paıdaly qazbalardy barlaý ári óńdeý, ınfraqurylymdy jańǵyrtý jáne basqa da salalar qazaq-amerıkan qarym-qatynastarynyń negizgi baǵyttary sanalady.
Sondaı-aq halyqaralyq jáne óńirlik qaýipsizdik máselesine basa mán berildi. Bul rette prezıdent Máskeý oblysyndaǵy lańkestik áreketti Qazaqstan álemde alǵashqylardyń biri bolyp qatań aıyptaǵanyn jáne osyndaı qıyn-qystaý kezeńde Reseımen birge ekenin atap ótti.
Qasym-Jomart Toqaevtyń pikirinshe, barlyq el terorızmge qarsy kúreste ózara qarym-qatynastaryndaǵy qaıshylyqtarǵa qaramastan, úlken halyqaralyq koalısıa aıasynda kúsh biriktirýge tıis. Qazaqstan osy mańyzdy iske óz úlesin qosýǵa daıyn.