Qazaqstanda Qańtar oqıǵasynan keıin qozǵalǵan qylmystyq is boıynsha 152 adam sottalǵan. Onyń 17-si túrmege qamalǵan. Bul jóninde sáýirdiń 4-ine tústen keıin Ortalyq komýnıkasıa qyzmetindegi brıfıń kezinde Bas prokýratýranyń ókili Eldos Qılymjanov aıtty. Onyń sózine qaraǵanda, "aýyr qylmys jasap, qarý-jaraq urlaǵan, ony saqtap qoıǵan, shyǵyndy ornyna keltirmegen jáne buǵan deıingi sottylyǵy ótelmegen" adamdar túrmege qamalǵan.
Qılymjanovtyń aqparatyna qaraǵanda, kinásin moıyndap, shyǵyndy ornyna keltirgenine baılanysty 35 adamnyń bostandyǵy shektelip, qoǵamdyq jumysqa jegilgen. Vedomstvo aralyq jedel tergeý toby 242 qylmystyq isti qarap jatyr, onyń 44-i "terorızm aktisi" jáne 47-si "jappaı tártipsizdik" jónindegi ister. Qazirge deıin 323 adamǵa baılanysty 209 qylmystyq is sotqa jiberilgen.
Bas prokýratýranyń málimetinshe, 733 adam qamaýda otyr.
Bas prokýratýra ókiliniń brıfıńte aıtqan sózine qaraǵanda, qyzmet babyndaǵy áreketsizdigi úshin 9 qylmystyq is qozǵalǵan. 5 qańtarda UQK-niń úsh departamentiniń bastyǵy men polısıanyń eki departamentiniń bastyǵy qyzmet ornynan ketip qalǵan.
Brıfıń kezinde Jambyl oblystyq polısıasy bastyǵynyń orynbasary men Almaty áýejaıyndaǵy jelilik polısıa bastyǵynyń ustalǵany habarlandy.
Qılymjanovtyń málimetinshe, Almaty qalasy, Almaty oblysy, Jambyl oblysy, Qyzylorda oblystarynda mindetin atqaryp júrgen 19 ofıserdiń qandaı jaǵdaıda mert bolǵany anyqtalǵan.
Bılik tergeýde zańsyz tásil qoldanǵany jáne azaptaǵany jónindegi shaǵymdar men qozǵalǵan qylmystyq isterdiń sanyn 14 naýryzdan beri jańartpaǵan. Jemqorlyqqa qarsy is-qımyl búrosy 14 naýryzda 234 is qaralyp jatqanyn jarıalaǵan bolatyn. Dúısenbidegi brıfıńte sóılegen spıkerler burynǵy málimetti qaıtalap, UQK departamentiniń segiz qyzmetkeri men bir polıseı qamaýǵa alynǵanyn aıtty.
14 naýryzda UQK "memleketke opasyzdyq jasaý", "bılikti basyp alý" jáne "asa iri kólemde para alý" faktileri boıynsha 15 is tergelip jatqanyn habarlaǵan edi. Bas prokýratýranyń habaryna qaraǵanda, bul ister boıynsha UQK-niń burynǵy tóraǵasy Kárim Másimov pen onyń úsh orynbasary qamaýǵa alynǵan. "Qyzmet ókiletin asyra paıdalandy" degen kúdikke ilingen osy vedomstvonyń taǵy eki basshy qyzmetkeri qylmystyq jaýapqa tartylǵan.
Bıyl qańtardyń basynda gaz baǵasyn 50 teńgeden asyrmaý týraly Jańaózende bastalǵan talap Qazaqstannyń ár óńirlerinde jalǵasyp, qantógiske ulasqan edi. Qazaqstan bıligi qantógiske "shetelde ázirlengen terrorıster aıypty" dep málimdegenimen, naqty dálel keltire almaǵan. Resmı málimetke qaraǵanda, Qańtar oqıǵasynda kemi 230 adam ólgen. Taǵy da segiz adam tergeý abaqtylarynda qaıtys bolǵan.
Qazaqstan prezıdenti ákimshiligi basshysynyń birinshi orynbasary Tımýr Súleımenov Eýropadaǵy Euractiv basylymynda 29 naýryzda jarıalanǵan suqbatynda "Qańtar oqıǵasynda 150 adam qaıtys boldy" degen málimet keltirgen.
Qańtar oqıǵasynan keıin myńdaǵan adam qamalyp, júzdegen adamǵa "jappaı tártipsizdikke qatysty", "qarý-jaraq urlady", "terror jasady" degen aıyp taǵylǵan. Qamalǵandardan tergeý kezinde uryp-soqty, azaptady degen shaǵymdar shaǵym jıi túsken.
