İshki ister mınıstrligi qańtar oqıǵasy boıynsha 107 qylmystyq is aıyptaý aktisimen aıaqtalǵanyn málimdedi.
Vedomstvo málimeti boıynsha, negizgi ister "urlyq", "qarý-jaraq urlaý, ony zańsyz saqtaý" baptary boıynsha qaralǵan.
İİM tergeý departamentiniń basshysy Sanjar Ádilov "sotqa deıingi tergeýdiń sapaly júrgizilýine jáne ony tezdetip aıaqtaýǵa asa mán berilip jatyr" dep málimdedi. Búgingi kúnge deıin 86 aıyptaý isi sotqa berilgen, sot 52 adamǵa sheshim shyǵarǵan.
Olardyń 39-nyń erkindigi shektelgen, 13 adam bas bostandyǵynan aıyrylǵan, eki adamnyń isi "taraptardyń kelisimge kelýine baılanysty" toqtatylǵan. Qaı qalalarda sot isi júrgenin İİM ókili naqty aıtpady.
İİM málimetinshe, búgingi kúni 2729 qylmystyq is boıynsha 250 adam qamaýǵa alynǵan, 140-na bultartpaý sharasy qoldanylǵan, 62-si úıqamaqta otyr, 33-si kepildik berip bosatylǵan, 45-sinen elden ketpeý jóninde qolhat alynǵan.
Negizgi qylmystyq ister "Urlyq" (1844 is), "Bóten adamnyń múlkine ádeıi zaqym keltirý" (144), sonymen birge "qarý-jaraqty zańsyz saqtaý" (343) baptary boıynsha tergelip jatyr.
Bas prokýratýra málimetine qaraǵanda, qańtar oqıǵasyna baılanysty sotqa deıingi 3096 is tirkelgen. Arnaıy prokýrorlar "jappaı tártipsizdik jáne terorızm aktisi" boıynsha 181 isti tergep jatyr. 741 kúdikti sot sanksıasymen qamaýǵa alynǵan. 157 kúdiktiniń bultartpas sharasy densaýlyǵy jáne ózge jaıttarǵa baılanysty qamaýmen baılanysty emes shara túrimen almastyrylǵan.
Qańtar kóterilisine baılanysty alǵashqy sot sheshimi shyqty. Almaty qalasy Almaly aýdandyq sotynyń sýdıasy Qaırat Imanqulovtyń sheshimimen Almaty oblysy Eńbekshiqazaq aýdany Esik qalasynyń turǵyndary Baqyt Ońtaı men Ójet Jeńishan 5 jylǵa sottap, jazalaryn qaýipsizdigi ortasha rejımdegi túzeý mekemesinde óteýge kesken. Ekeýi de 1999 jyly týǵan, 22 jasta. Bul týraly Azattyqqa sottalýshylardyń týystary habarlady.
Baqyt Ońtaı men Ójet Jeńishanǵa memleket bekitken advokat Quralaı Qalıasqarovanyń sózinshe, olarǵa Qylmystyq kodekstiń 291 baby 3 bóligi boıynsha ("Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý") aıyp taǵylǵan.
2022 jyly qańtardyń basynda gaz baǵasyn 50 teńgeden asyrmaý týraly talappen ereýilge shyqqan Jańaózen turǵyndaryn qoldaý úshin Qazaqstannyń kóptegen aımaǵynda bastalǵan aksıalar birtindep saıası talap qoıǵan narazylyqqa ulasqan. Resmı málimet boıynsha, 227 adam osy oqıǵada qaza bolǵan.
