Tiri bolsam, qazaqqa qyzmet etpeı qoımaımyn!

Álıhan Bókeıhan

"Aýzyńdy jap ta tynysh júr», – dedi. 10 jyldaı Qaırat Rysqulbekovtyń ólimi týraly eshkimge aıtpaı júrdim.

28 sáýir 2022 75
 


Qaırat Rysqulbekovti qaıtys bolarynan bir kún buryn tergeý ızolátorynda monshaǵa aparǵan semeılik Maqsut Ospanov eshkimge aıtpaǵan derekterimen bólisti.

Aıqyn basylymynyń habarlaýynsha, Maqsut Ospanov 1979-1991 jyldary Semeıdegi oqshaýlaý tergeý ızolátorynyń starshına jasaǵynda konvoı, baqylaýshy, kaptershık qyzmetterin atqarǵan. Onyń aıtýynsha, Qaırat Rysqulbekovty monshaǵa qalaı aparǵany áli esinde.
Qaırat Rysqulbekovtyń túrmedegi kúzetshisi sumdyq shyndyqtyń betin ashty

Áli kúnge deıin esimde. Saǵat 3 kezinde monshaǵa ózim ertip apardym, kıimin, bárin aýystyryp berdim. Saǵat 4-5 shamasynda ka­meraǵa kirgizdim. Tańerteń kelsem, túrmede aıǵaı-shý. Qaırat qaıtys bolypty. Ne bolǵanyn ózim túsinbeı qaldym» deıdi Ospanov.

Maqsut Ospanov Qaırattyń erekshe baqylaýdaǵy kamerada otyrǵanyn aıtty.
«Bir kisilik kamerada otyrdy. 22 kamera – erekshe baqylaýdaǵy kamera. «Smertnıkter kamerasy» dep alalatyn, onda atý jazasyna kesilgender otyrady» deıdi Maqsut Ospanov.

Burynǵy túrme qyzmetkeri buǵan deıin barlyq kitap­tarda, baspa betterinde «Qaırat Rysqulbekov Semeı túrmesindegi 21 kamerada ajal qushty» degen sózben kelispeıdi.
«Semeı túrmesinde 10 jyldan astam eńbek etken adammyn. Men jurt sekildi estigenimdi emes, kór­genimdi aıtyp otyrmyn. Qaıratty ózim kameradan alyp shyǵyp, monshaǵa aparyp júrdim. Menińshe, Qaı­rat óz ajalynan ólgen joq. Bireýler óltirdi. Al ony 21 ka­me­raǵa aýystyrsa kúndiz aýystyrýy kerek edi. 22 ka­merany ekiniń biri asha almaıdy. Jedel qyzmet bas­tyǵy men túrme bastyǵy ǵana asha alady. Qaıratty ózi otyrǵan 22 ka­merada óltirip, 21 kameraǵa apa­ryp tastaýy da múmkin» deıdi ol.

Sondaı-aq, Maqsut Ospanov Qaırat Rysqulbekovtyń kúndeligi jaıly estelik aıtyp berdi.
«Túrmedegi árbir kisiniń zat­taryn, kıimin qoıatyn arnaıy oryn bolady. Qaırattyń qalyń dápteri sonda turatyn. Umytpasam, túsi qońyr bolýy kerek. İshi tola jazý. Bir kúni «Kúndeligińdi oqýǵa bola ma?» dep Qaırattyń ózinen ruqsat suradym.«Oqyńyz. Biraq eshkimge bermeńiz», – dedi. Bireýge bersem, óz basyma bále bolady ǵoı. Sóıtip, Qaırattyń kúndeligin oqy­ǵan jaıym bar. Oqydym de­gennen góri sholyp shyqtym dege­nim durys shyǵar. Áke-sheshesine arnaǵan óleńderi, mahabbat taqy­rybyndaǵy óleńderi boldy» deıdi burynǵy túrme kúzetshisi.

Qaırat qaıtys bolarynyń aldynda kúndelikti kamerasyna alyp ketke­n. Maqsut Ospanov oǵan kúndeligin ózi qıylyp suraǵan soń jasyryn túrde bergen eken.
«Qıylyp suraǵan soń amalsyz berdim. Bir jaǵy qoryq­tym. Bilip qoısa, meni jumystan shyǵarýy da múmkin edi. «Qoly­ńyzdan aldym, qolyńyzǵa beremin. Tańerteń alasyz», – dedi. Tańerteń anadaı jaǵdaı boldy. Kúndelik sol kúıi tabylǵan joq. Keıin ta­byldy dep estidim. Ózim biraq kór­gen joqpyn. Osylaı bolaryn bilsem, dápterdi kóshirip alar edim. Ol kezde fotoǵa túsirip alatyn uıaly telefon da joq qazirgideı» deıdi ol.

Qaırat qaıtys bolǵanda ony jalǵyz ózi monshaǵa aparǵany úshin Maqsuttan da kúdiktenip, suraqtyń astyna alǵan kezder de bolypty.
«Sen eshteńe kórgen joqsyń, monshaǵa apardyń da alyp keldiń. Aýzyńdy jap ta tynysh júr», – dedi bastyqtar. 10 jyldaı eshkimge aıtpaı júrdim. Qazir aqyryndap aıtyp júrgen jaıym bar» deıdi Maqsut Ospanov.




Derekkóz
Bul maqala týraly ne oılaısyz?