Tiri bolsam, qazaqqa qyzmet etpeı qoımaımyn!

Álıhan Bókeıhan

«Pýtın teraktini Ýkraınanyń moınyna artqyzbaq» – Zelenskıı

25 naýryz 2024 264

Ýkraına prezıdenti Vladımır Zelenskıı senbi kúni keshke Máskeý túbindegi "Krokýs sıtı holdaǵy" teraktige qatysty pikir bildirdi. Ol Reseı prezıdenti Vladımır Pýtındi "teraktige kináni Ýkraınaǵa artýǵa tyrysyp jatyr" dep aıyptady.

Zelenskıı óz sózinde teraktige Reseı bıliginiń yqtımal qatysyn da meńzedi.

"Máskeýde keshe bolǵan oqıǵany Pýtın men ózge de ońbaǵandar bireýdiń moınyna artýǵa tyrysyp jatyr. Olardyń ádisteri bir. Mundaı nárse buryn da bolǵan. Jarylǵan úıler men atystar, jarylystar. Olar árdaıym ózgelerdi kinálaıdy" dedi Ýkraına prezıdenti.

Onyń sózinshe, Ýkraınada soǵysyp jatqan reseılikter Ýkraınada qan tókpeı, óz elderinde bolǵanda Reseıdegi kez kelgen qylmyskerdi toqtatýǵa shamasy jeter edi.

Buǵan deıin Reseı bıligi Ýkraına jaǵyn "terrorısterdiń Reseıden shyǵýyna jaǵdaı jasady" dep aıyptaǵan.

Ýkraına bas barlaý basqarmasynyń tóraǵasy Andreı Iýsov Pýtınniń boljamy "syn kótermeıdi" dedi.

Iýsovtyń sózinshe, Reseı basqynshylyǵynyń úshinshi jylynda Ýkraınanyń shekaradaǵy aımaqtary "ásker, arnaıy agent, arnaıy qyzmet pen kúshtik qurylymdarǵa" toly, "shekara syzyqtary mınalanǵan, eki jaqty da áýeden barlaý qyzmeti baqylap tur".

Bul maqala týraly ne oılaısyz?