29 naýryz, juma kúni Tashkentte «Avtokóliksiz kún» aksıasy ótedi. Prezıdenttiń aqpan aıyndaǵy jarlyǵymen bul kúni basshylar men basqa da memlekettik qyzmetkerler jumysqa qoǵamdyq kólikpen barýy kerek.
Ózbekstannyń Ekologıa, qorshaǵan ortany qorǵaý jáne klımattyq ózgerister mınıstrligi 29 naýryz, juma kúni Tashkentte «Avtokóliksiz kún» aksıasyn ótkizedi. Bul týraly mınıstrliktiń baspasóz qyzmeti taratqan habarlamada aıtylǵan.
Aksıanyń negizgi maqsaty – salaýatty ómir saltyn nasıhattaý, qorshaǵan ortany qorǵaý máselelerine qoǵamnyń nazaryn aýdarý, qalalardaǵy kólik qozǵalysyn azaıtý jáne qoǵamdyq kólikti damytý.
Ekologıa mınıstrligi barshany «bul kúni ótip jatqan aksıaǵa beı-jaı qaramaı, qoǵamdyq kólik, velosıped jáne qorshaǵan ortaǵa zıan keltirmeıtin basqa da kólik túrlerin tańdaýǵa» shaqyrdy.
Eske salaıyq, Tashkentte aıyna bir ret ótetin «Avtokóliksiz kún» qoǵamdyq jobasyn júzege asyrý, qalyń jurtshylyq ókilderi men tabıǵatty qorǵaý belsendileriniń usynystary negizinde prezıdent Shavkat Mırzıóevtiń 21 aqpandaǵy jarlyǵymen bekitilgen bolatyn.
Bul kúni ǵımarattary Tashkentte ornalasqan barlyq respýblıkalyq jáne jergilikti atqarýshy bılik organdarynyń basshylyǵy men basqa da qyzmetkerlerine «jumys ornyna qoǵamdyq kólikpen kelý arqyly jeke úlgi kórsetý» tapsyryldy.
