Mektepterdegi álimjettik áli tyıylmaı tur. Astanada mekteptiń tórtinshi qabatynan oqýshy sekirip ketti. Bala qazir aýrýhanada jatyr, jaǵdaıy aýyr. Jasóspirimniń mundaı qadamǵa ne sebeppen barǵanyn polısıa anyqtap jatyr. Al týystarynyń óz boljamy bar. Olar balany basqa oqýshylar bopsalaǵan dep esepteıdi.
KTK telearnasynyń habarlaýynsha, 8 synyp oqýshysy Bekbolat Saılaý keshe túste aýyr jaǵdaıda aýrýhanaǵa jetkizilgen. Qoly, eki aıaǵy synǵan, beline zaqym kelgen. Dárigerler ota jasap, bala búgin ǵana esin jıdy.
"Oń aıaǵy, oń qolyna ota jasadyq. Búgin tańerteń jalpy palataǵa aýystyryldy",-deıdi Arslan Dúısenbaev, №2 kópbeıindi balalar aýrýhanasynyń bólim meńgerýshisi.
Bala esin jıǵan soń ǵana mán jaıdy ata-anasy búgin bilip otyr.
"Erdáýlet degen bala, Arýjan ekeýi «meni bospasalaǵan» dedi. «Ony ázirge aıtpaımyn» dedi. Al Erdáýlet, Dımash, Ádilet degen synybyndaǵy bala meni dárethanada uryp, «qońyraý bolǵansha seni óltiremiz, polısıaǵa beremiz, ázir kóresiń, sabaqtan shyqqanda óltiremiz» dep aıtty deıdi. Sodan ashýlanyp kettim de, qońyraý shalyndy, aǵylshyn pániniń muǵalimi kirdi, sabaq biteıin degenshe, terezege qarap otyrdym, sabaq bitkennen keıin «ólip alaıynshy, mynalar meni óltiredi, polısıaǵa beretin boldy dep» sekirip kettim» dedi",-deıdi oqýshynyń anasy Lázzat Rahmash.
Týystary bala býllıngtiń qurbany boldy dep sanaıdy. «Osy mektepke aýysqaly qysymnan kóz ashpaı keledi, birneshe ret úıge beti kógerip keldi» - deıdi jaqyndary. Mektep basshylyǵy da osy oqıǵadan keıin abdyrap otyr. Bekbolatty tynysh, sabyrly bala dep minezdeme bergen dırektor «odan mundaıdy kútpedik» deıdi.
"Eshkim baıqamaı qaldy. Balalar tapsyrma oryndap otyrǵan, muǵalim kitap qarap otyrǵan. Bári tez bolǵan. Muǵalim sanaýly sekýndta basymdy kótergende, balanyń terezede ilinip turyp, qulaǵanyn kórdim dep otyr",—deıdi №72 mektep-lıseı dırektory Aıman Dúısenova.
Shoshynyp qalǵan oqýshylar men muǵalimmen psıhologtar jumys istep jatyr. Al dırektory bilim ordasynda «býllıng bolǵan joq» dep azar da bezer. Mán-jaıdy qazir polısıa anyqtap jatyr. İs ishki ister mınıstrliginiń baqylaýynda.
"Oqıǵany sotqa deıingi tergeý reestrine tirkedik. Tergeý bastaldy, sonyń nátıjesi boıynsha qorytyndy shyǵara alamyz. Oqıǵanyń sebebin dál qazir naqty aıta almaımyn",— deıdi QR İshki ister mınıstriniń birinshi orynbasary marat Qojaev.
Bir ólimnen aman qalǵan oqýshy endi uzaq emdelýi kerek. Aq halattylar taıaý arada onyń ekinshi aıaǵyna ota jasaýdy josparlap otyr.
