Tiri bolsam, qazaqqa qyzmet etpeı qoımaımyn!

Álıhan Bókeıhan

"Nege «Bolashaq» ózderinen ketken olqylyqty moıyndaǵysy kelmeıdi". "Bolashaqtyń" daýy tereńdep bara jatyr

04 maýsym 2024 313

Astana sotynda «Bolashaq» ortalyǵy tóńireginde týǵan daýǵa qatysty azamattyq is apelásıalyq satyda qaralyp jatyr, dep habarlaıdy Alash.kz.

İs boıynsha talap aryz berýshi – «Halyqaralyq baǵdarlamalar ortalyǵy» AQ. Jaýapkerler – Natalá Vorobeva jáne Maqpal Dáribaeva.

4 maýsymda ótken sot otyrysynda «Bolashaq» ortalyǵy ókilderi týyndaǵan daýdy medıasıa túrinde retteý boıynsha ótinishhat berdi. Sondaı-aq is boıynsha is júrgizýdi toqtata turýdy surady dep jazdy Halyq Uni.

Medıasıaǵa negizgi boryshker Valerıa Gavrılenko tartylýy úshin ótinishhat joldadyq. Qazir ortalyq («Bolashaq» - red.) Valerıa Gavrılenkoǵa qatysty shara qabyldap jatyr. Naqty aıtqanda, ortalyq bastamasymen qylmystyq jaýapkershilikke tartý týraly aryz. (Medıasıaǵa – red.) múmkin bolsa eki apta ýaqyt berýdi suraımyz, - dedi «Bolashaq» ókili Altynaı Kenjesarına.

Jaýapker tarapy medıasıaǵa tek «Bolashaq» qaryz kólemin aıtarlyqtaı tómendetse ǵana kelisetinin jetkizdi.

Qaryz somasy – 28,5 mln teńge. Odan kepilge qoıylǵan múliktiń qunyn azaıtý kerek – 25,7 mln teńge. Qalǵan somadan Gavrılenko quıǵan 1,3 mln teńgeni azaıtý qajet. Sońynda 1,5 mln teńge qalady. Natalá Vorobeva jáne Maqpal Dáribaeva bul somany tóleı alady, osyndaı jaǵdaıda ǵana medıasıaǵa kelise alady, - dedi advokat Aıjan Tashenova.

Azamattyq isti qaraǵan sot alqasy «Bolashaq» ortalyǵy ókilderiniń ótinishhatyn qanaǵattandyrdy.

Daýdy medıasıa tártibimen retteý úshin sot otyrysy keıinge qaldyrylsyn, - dedi sot alqasynyń tóraǵasy.

«MINISTR AITQAN KELİSİMDİ KÓRMEDİK»

Buǵan deıin Ǵylym jáne joǵary bilim mınıstri Saıasat Nurbek «Bolashaq» tóńiregindegi daýǵa qatysty pikir bildirdi.

Osydan 2-3 kún buryn Valerıa Gavrılenko kinásin tolyqqandy moıyndap, ekijaqty kelisimshartqa qol qoıyldy. Sol kelisimshart aıasynda ol búkil aqshany qaıtarýǵa jaýapkershilik aldy. Al, jaýapty tulǵalarǵa keletin bolsaq... Tıisti zańnama aıasynda Bas prokýratýra máseleni bastap ketti, - dedi Saıasat Nurbek.

Mınıstr másele zań aıasynda sheshiletinin, grant ıelerine talap qoıylmaıtynyn aıtty.

Alaıda azamattyq is boıynsha jaýapkerler bul kelisimniń jasalǵanyna kúmánmen qaraıtynyn jetkizdi.

Ǵylym jáne joǵary bilim mınıstri Saıasat Nurbektiń «Gavrılenkomen kelisim jasadyq» degen málimdemesin dáleldeıtindeı, ol kelisimdi kóre almadyq. Kelisimshart bar ma, joq pa, kúmán bar. Boljamymyz boıynsha, bul kelisimshart joq. Bizge medıasıaǵa ýaqyt berdi. Bizdiń tek qana bir talabymyz bar. Zańsyz kepilden shyǵarylǵan eki úıdiń baǵasyn eseptedik. Ol 26 mln teńgege jýyq qarajat. Gavrılenkonyń 1,3 mln teńge tólegen qarajaty bar. Sodan qalǵan 1,5 mln teńge bar. Bul qarajatty Natalá Vorobeva ekeýmiz bólip tóleýge kelisemiz. Sol kezde ádiletti bolady. «Bolashaqtyń» zańsyz bergen eki úıine biz jaýap berýge mindetti emespiz. Nege «Bolashaq» ózderinen ketken olqylyqty moıyndaǵysy kelmeıdi. Nege áli kúnge deıin eki páterdi qaıtarýǵa áreket etpeı otyr? Boljamymyz boıynsha, jemqorlyqqa jol bergen bir de bir sheneýnik qylmystyq, dısıplınarlyq jaýapkershilikke tartylǵan joq. Bul — ádiletsiz, - deıdi Maqpal Dáribaeva.

Aıtýynsha, kepilge qoıylyp shyǵarylǵan eki páterdiń birinde Gavrılenkonyń anasy turyp jatyr.

«Advokattyq suraý saldyq. Boljamymyz boıynsha Petropavldaǵy páterinde qazir anasy turady. (...) «Bolashaq» Gavrılenkonyń ózi mindettemesin oryndamaǵanyna qaramastan ózi kepildikten zańsyz shyǵaryp berip otyr. Elden qashyp, Ulybrıtanıaǵa ketýine barlyq jaǵdaıdy jasaǵan. (...) Saıasat Nurbek «kelisimshart bar», «garanttarǵa ýaıymdaýdyń qajeti joq» dedi. Biraq ol kelisimshart qaıda? Nege bizge kórsetpeıdi? Ol kelisimshart bar ma? Joq pa?», - deıdi Dáribaeva.

Ol kezde «Bolashaq» ortalyǵy dırektory qyzmetin Janbolat Meldeshov atqarǵan.

«Tıisti organdar tekserý jumystaryn júrgizip, sol kezde jumys istegen laýazymdy tulǵalar jaýapqa tartylsyn», - deıdi Maqpal Dáribaeva.

Aıta keteıik, buǵan deıin «Halyqaralyq baǵdarlamalar ortalyǵy» AQ osy jaǵdaıǵa qatysty málimdeme jasap, shetelde zańsyz júrgen stıpendıattarǵa qatysty aýqymdy tekseris júrip jatqanyn habarlady.

Bul maqala týraly ne oılaısyz?