Qazaqstan bas prokýratýrasy 3 mamyrda kedennen ótetin taýar deklarasıasyna baılanysty kóptegen zań buzý faktilerin anyqtaǵan tekserý qorytyndysyn jarıalady. Prokýratýra tekserý anyqtaǵan zań buzý faktileri saldarynan memleketke mıllıardtaǵan zıan kelgenin atap kórsetken.
"Baj tóleýden jaltarý jáne taýar deklarasıasynda jalǵan málimet kórsetý saldarynan memleketke 165 mıllıard teńge kóleminde zıan kelgen" deıdi prokýratýra.
Baspasózge arnalǵan habarlamada "quzyrly ekonomıkalyq organ ókilderi kásipkerlerdiń salyqtan jaltarýyna" jaǵdaı jasap, keıingi eki jylda 221 mıllıard teńgeniń jalǵan qujatyn jasaǵany aıtylǵan. Al bir aı ishinde jalpy kuny 800 mıllıon teńgege tatıtyn 16 kontrabanda faktisi áshkerelengen.
"Mysaly, Group Of The Companies Tda jaýapkershiligi shekteýli seriktestiginiń júgin tekserý barysynda qujatta kórsetilmegen 287 mıllıon teńgeniń taýary shyqty. Kompanıa basshysy tutqyndaldy" dep habarlady bas prokýratýra ókili Darhan Dúısembaı.
Azattyq ashyq derekkózderden anyqtap kórgen Group Of The Companies Tda degen kólik fırmasy quryltaıshysynyń biri Ánıpa Nazarbaeva dep kórsetilgen. Bul adamnyń aty-jóni men jeke derekteri eks-prezıdent Nursultan Nazarbaevtyń týǵan qaryndasynykimen birdeı. Kompanıa byltyr búdjetke 14,5 mıllıard teńgeden astam salyq tólegen.
Prokýratýra "keden salasyn tekserýshilerge 30 myń AQSH dollary kóleminde para berdi" dep kórsetken "Cargo Management" kompanıasy qazir Áset Nurdos degen azamatqa qaraıdy. Aty-jóni dál osyndaı adam eks-prezıdent Nazarbaevtyń úlken qyzy Darıǵa Nazarbaevanyń "kúıeýi" delinetin Qaırat Sháripbaevqa tıesili bolǵan kompanıalardy basqaratynyn Azattyq jýrnalısik zertteýinde anyqtaǵan edi.
"Cargo Management" kompanıasy alǵash tirkelgen 2016 jyly birneshe zańdy tulǵa arqyly Qaırat Sháripbaev, Darıǵa Nazarbaeva, Aısultan Nazarbaev pen Ǵalym Nurǵazıevke qaraǵan.
Bas prokýratýra habarlamasynda "Nurly jol" keden beketi bastyǵy men orynbasary "qylmysty áreketke barýǵa yńǵaı tanytqan" prokýratýra qyzmetkerine para bergen degen kúdikpen ustalǵany, barlyq fakti boıynsha sotqa deıingi tergeý amaldary júrip jatqany aıtylǵan. Buǵa qosa kedendegi anyqtalǵan kemshilikterdi joıý úshin úkimetke prokýrorlyq baqylaý aktisi joldanǵan.
Qańtar oqıǵasynan keıin burynǵy prezıdent Nursultan Nazarbaevtyń otbasy músheleri men olarǵa jaqyn keıbir adamdardyń ústinen is qozǵalǵan. Naýryzda Nazarbaevtyń nemere inisi Qaırat Satybaldy tutqyndaldy. Jemqorlyqqa qarsy qyzmet Satybaldynyń ústinen "aqsha jymqyryp, qyzmet babyn asyra paıdalanǵan" jáne "memleket qaýipsizdigine qater tóndiretin ózge de qylmystarǵa qatysy bar" degen kúdikpen is qozǵalǵanyn habarlady. Onyń burynǵy áıeli Gúlmıra Satybaldy "2017 jyly Almatyda ótken qysqy Ýnıversıada oıyndary nysandaryn jóndeýge bólingen qarjyny jymqyrǵan" degen kúdikpen qamaýǵa alynyp, ústinen is qozǵaldy. Nazarbaevtyń úlken qyzy Darıǵa Nazarbaevanyń qudasy Qaırat Boranbaev iri kólemde aqsha jymqyrdy degen kúdikpen naýryzda eki aıǵa tutqyndaldy. Al bir kezderi keı sarapshylar Nursultan Nazarbaevtyń bıliktegi murageri sanaǵan Darıǵa Nazarbaeva májilis depýtattyǵynan ketti.
