Qazaqstannyń burynǵy prezıdenti Nursultan Nazarbaev ózi týraly Qazaqstan konstıtýsıasyna engiziletin ózgeristerdi qoldaıtynyn, aldaǵy jeksenbide ótetin referendýmǵa baratynyn málimdedi.
"Iá, 5 mamyrda konstıtýsıalyq quqyǵymdy mindetti túrde paıdalanyp, referendýmǵa baryp daýys beremin", — deıdi Nursultan Nazarbaev saıasattanýshy Danıar Áshimbaevqa bergen, 30 mamyrdy jarıalanǵan suqbatynda. Suqbatta Danıar Áshimbaev burynǵy prezıdentke "ózińizge baılanysty konstıtýsıadaǵy statýsty ózgertýdi qoldaısyz ba" dep suraǵan.
Nazarbaev suqbatta osydan úsh jyl buryn prezıdent ókiletin óz erkimen tapsyrǵanyn málimdegen jáne "sarapshylar eldegi bılik tranzıti qatań baqylaýda ekenin bilsin dep ózine birqatar ókilet alyp qalǵanyn" aıtqan.
- 2019 jyly kópshiliktiń qarsylyǵyna qaramastan memleket basshylyǵynan sanaly túrde kettim. Halyq meniń saıasatymdy qoldap turǵan kez bolatyn. Oǵan 2015 jyly prezıdent saılaýynda 97,7 paıyz daýys alǵanym dálel", — deıdi Nazarbaev.
"Iá, belgili bir ókiletter mende qaldy. Biraq ony saıası tranzıtti birtindep júzege asyryp, qoǵam men bılik elıtasyndaǵy qaıshylyqty jumsartý úshin jasadym", — deıdi ol.
Batys baqylaýshylary Qazaqstandaǵy birde — bir saılaýdy erkin jáne ádiletti saılaý dep baǵalaǵan emes. Quqyq qorǵaýshylar Nursultan Nazarbaevty da, Qasym — Jomart Toqaevty da "ózgeshe oılaıtyndarǵa qysym jasady, adam quqyǵyna nuqsan keltirdi" dep aıyptaıdy.
Bıyl Qazaqstan prezıdenti Qasym — Jomart Toqaev Qazaqstan konstıtýsıasyna ózgerister men tolyqtyrýlar engizý jóninde referendým ótkizý týraly jarlyq shyǵarǵan. Táýelsiz sarapshylar bılik usynǵan ózgerister avtorıtarlyq júıe tabıǵatyn ózgertpeıdi, saıası júıede prezıdent róli burynǵysha qala beredi dep sanaıdy.
Referendým jarıalanar qarsańda burynǵy prezıdenttiń "táýelsiz Qazaqstannyń negizin salýshy" degen mártebesi daý týdyrǵan edi. Qoǵam aýanynan keıin bılik "elbasyn" eske túsiretin barlyq normalardy alyp tastaıtynyn, konstıtýsıaǵa ózgeris engen soń tuńǵysh prezıdent týraly zańnyń kúshin joıý máselesin kóteretinin málimdegen.
Nazarbaev suqbatynda "qańtar aıynda Toqaevqa qaýipsizdik keńesiniń tóraǵasy ókiletin bergenin aıtqan". "Prezıdenttiń sol kezdegi sheshimtal áreketi oqıǵany odan ári ýshyqtyrmady", — deıdi Nazarbaev.
Qańtar oqıǵasy kezinde Nursultan Nazarbaev qaýipsizdik keńesiniń tóraǵasy qyzmetinen aıyrylyp, odan soń jaqyn týystary men serikteri yqpaldy iri qyzmetterden ketken soń Toqaev bılikti óz qolyna shoǵrlandy degen boljam jıi sóz bolǵan.
Qańtar oqıǵasy kezinde Qasym — Jomart Toqaev qaýipsizdik keńesiniń tóraǵasy qyzmetin atqarýdy óz moınyna alǵanyn málimdegen edi. Ol kezde Toqaev pen Nazarbaev arasynda bılik úshin kúres bolyp jatyr degen boljamdar aıtylǵan, biraq ekeýi de teriske shyǵarǵan.
