NATO bas hatshysy Iens Stoltenberg Reseıdiń Ýkraına shyǵysyndaǵy "Lýgansk halyq respýblıkasy" jáne "Donesk halyq respýblıkasynyń" táýelsizdigin moıyndaý týraly sheshimin aıyptady.
21 aqpan kúngi málimdemesinde Stoltenberg prezıdent Vladımır Pýtınniń sheshimi "Ýkraınanyń táýelsizdigi men terıtorıalyq tutastyǵyna nuqsan keltirip, qaqtyǵysty sheshýge jumsalǵan bar kúsh-jigerdi zaıa etedi jáne [atysty toqtatý] týraly Mınsk kelisiminiń sharttaryn buzady" dedi.
NATO, AQSH pen batys jetekshileri Reseıdi NATO-ǵa qosylǵysy kelgen Ýkraınany basyp alýǵa tyrysty dep aıyptaǵan. Ýkraınamen shekarasyna 150 myń áskerin ornalastyrǵan Máskeý shabýyl josparyn joqqa shyǵaryp, NATO men batysty aımaqta jaǵdaıdy turaqsyzdandyrdy dep kinálaǵan. Jýyrda Máskeý NATO-nyń Ýkraınany soltústikatlantıkalyq odaqqa múshe retinde qabyldamaıtyny týraly ýádesin alýǵa tyrysqan jáne Shyǵys Eýropadan qarý-jaraǵy men ınfraqurylymyn alyp ketý týraly da talap qoıǵan.
21 aqpanda Ýkraınadaǵy separatıstik aımaqtardyń "táýelsizdigin" moıyndaý týraly sheshimin jarıalaǵan Pýtın NATO Máskeýdiń qaýipsizdik talaptaryn "tutas eskerýsiz qaldyrdy" dep málimdedi.
"Máskeý separatısterdi qarjylyq jáne áskerı turǵyda qoldap, Ýkraına shyǵysyndaǵy qaqtyǵysty ýshyqtyrýyn tyımady. Ol sonymen birge Ýkraınany qaıta basyp alý úshin syltaý izdep otyr" dedi Stoltenberg.
