«Birge jumys isteıtin áriptesim «Saıtty aǵylshyn tilinde toltyrýǵa kómektesip jibershi» dep ótinish bildirdi. Soǵan kómektesip otyryp, oılamaǵan jerden ózim de ketip qaldym. 2022 jyldyń jeltoqsanynan ótinish berdim. Ótinishim qabyldanyp, 2023 jyly 1 mamyrdan vıza aldym. Vıza merzimi 1 qarashaǵa deıin alty aılyq bolatyn. Biraq 12 aılyq bolyp esepteledi. Alty aı ǵana sol jerde bolý kerek. Sonda 1 mamyrda barsaq, odan keıin kelesi jyldyń 1 mamyrynda bara alamyz. Oǵan deıin vıza almaımyz. Bizdiń maýsymdyq jumysqa arnalǵan vıza Tier5 dep atalady. Negizi bizdiń agenttiktiń ózi vıza toltyrýǵa kómektesti. Barlyǵy tegin boldy. Shyǵynǵa kelsek, bılet, konsýldyq alymǵa tóledik. Al jumysqa turý, agenttiktiń qyzmeti tegin boldy», – deıdi Mıraj Oıshıeva Aıqyn gazetine bergen suhbatynda.
Osylaısha, keıipkerimiz tórt balasyn anasyna qaldyryp, Anglıaǵa attanady. Kishkentaıy nebári eki jasta bolatyn. Sóıtip, ol jaqta qulpynaı men tańqýraı ósiretin jylyjaıǵa jumys isteýge barady. Negizgi jumys – qulpynaıdy japyraǵynan ajyratyp otyrý. Keıipkerimiz aıyna 1,5 mıllıonǵa jýyq tabys tapqanyn aıtady. Mıraj Oıshıevanyń ózi shet tilin biletindikten aýdarmashy da bolǵan arasynda. Al jalpy, ózimen birge barǵan otandastarymyzdyń kóbi joǵary bilim alyp, magıstratýra bitirgen, til biletin jastar. Sheteldikter osyǵan qyzyǵa qaraǵan.
«Bizben birge barǵan otandastarymyzdyń sany 8 myńǵa jýyq boldy. Barlyǵynyń moınynda nesıesi bar, úlkeni, kishisi bolsyn. Bir jas otbasyny bilemin. Jasy 25-te. Olar úı alý úshin bardy. Ekeýi aqshasyn jınap, Astanadan úı satyp aldy. Ondaı da jaǵdaı bar», – deıdi Mıraj Oıshıeva.
Keıipkerimiz Anglıada tek jumys istep qana qoımaı, PR-menedjer mamandaǵy bilim alyp kelgen. Endi Anglıa, AQSH, Eýropaǵa oqýǵa túsýge nıet bildirgen jandarǵa kómektesýdi josparlap otyr.