Qazaqstan boıynsha nasybaıǵa tyıym salyndy. Artynsha nasybaı óndiretin sehtar jabyldy. Sharýalar shyǵynǵa batyp, aýyl halqy jumyssyz qaldy. Sebebi aýdan jurtynyń 80 paıyzy nápaqasyn nasybaı arqyly tabady. Bul týraly alash.kz saıty 31-arnanyń “Informbúro” baǵdarlamasyna silteme jasap habarlaıdy.
"Mıllıondaǵan teńgeniń shıkizaty men qurylǵysy shań basyp tur" dep shyryldaǵan kásipkerler jergilikti bılikten kómek surady. Aıta keteıik, nasybaıdy satýǵa jáne óndirýge 2015 jyldan beri tyıym salynǵan. Biraq prezıdenttiń málimdemesinen keıin ǵana jappaı tekserister bastalǵan.
Nasybaı shyǵarýmen aınalysatyndardyń biri – aýdan turǵyny Dáýren Baltabaev. Biraq bul ónim qazir kásipkerdiń qoımasynda taý bolyp úıilip tur. Shetelden qyrýar qarajatqa aldyrǵan paket pen plasık qutylar da qoqysqa aınalǵan.
"Bunyń bárin Ózbekstannan aldyrǵanbyz. Keminde 1 mıllıon teńge qarajat ketti. Nasybaıǵa tyıym saldy. Endi bunyń bárin ne isteımiz? Bári qoqys bolyp jatyr. Aýdan turǵyndarynyń 80-90 paıyzy osymen kún kóredi, zaýyt joq", – deıdi Dáýren Baltabaev.
Prezıdenttiń ulttyq quryltaıdaǵy málimdemesinen keıin polısıa jappaı tekseris júrgizip, aýdandaǵy sehtardyń jumysyn toqtatqan. Qazir jurttyń qyp-qyzyl aqshaǵa alǵan qurylǵylary men shıkizaty qoımada shań basyp tur. Basqa kádege aspaıtyn bul shópti endi dıqandar kórshiles elderge shyǵaryp satsaq dep armandaıdy.
Nasybaıdy temeki untaǵynan jasaıdy. Aýdan azamattary temekini erte kóktemde jylyjaı ishine egip, keıin alqapqa aparyp otyrǵyzady. Qazir kóktep turǵan alqapty jyrtýǵa obalsynyp otyr. Al jumyssyz qaldyq degen turǵyndar aýdan ákimdigine kelgen. Atqaminerler shyǵynǵa batqan kásipkerlerdiń shıkizaty men nasybaı shyǵaratyn qurylǵylaryn kórshi elderge satýǵa kómektesýge ýáde berdi.
"Bul másele boıynsha Ózbekstan respýblıkasymen taýar aınalymy jóninde jumys istep jatqan kásipkerler bar. Qalǵan temekileri men aparattaryn sol jaqqa ótkizý múmkindigin qarastyrýda kómek bereıik", – dedi Keles aýdany ákiminiń orynbasary Súleımen Jylqybaev.
Sheneýnikter bıyl Keles aýdany "Aýyl amanaty" baǵdarlamasyna ilingenin aıtady. Soǵan sáıkes ár sharýaǵa 50 baǵyt boıynsha óz kásibin júrgizýge 9 mıllıon teńgege deıin aqsha beriledi. Ákimdik ókilderi nasybaı óndirýmen aınalysyp kelgen jurtty jańa kásipke baýlýdy bastaımyz dep otyr.
