Tiri bolsam, qazaqqa qyzmet etpeı qoımaımyn!

Álıhan Bókeıhan

Memleket basshysy Tóregeldi Sharmanovtyń otbasy men jaqyn týystaryna kóńil aıtty

25 mamyr 2024 278
Prezıdent Qasym-Jomart Toqaev memleket jáne qoǵam qaıratkeri, akademık Tóregeldi Sharmanovtyń otbasy men jaqyn týystaryna kóńil aıtý jedelhatyn joldady, dep habarlaıdy Alash.KZ ulttyq portaly. 

Memleket basshysy asa kórnekti ǵalym, Qazaq taǵamtaný akademıasynyń prezıdenti, Qazaqstannyń Eńbek Eri Tóregeldi Sharmanovtyń dúnıeden ótýine baılanysty onyń otbasy men jaqyn týystaryna kóńil aıtty.

"Tóregeldi Sharmanuly búkil sanaly ǵumyryn ult densaýlyǵyna arnaǵan biregeı tulǵa, bıik parasat ıesi edi. Otandyq medısınanyń alǵa basýyna bar qajyr-qaıratyn jumsap, kóptegen ıgi iske bastamashy boldy. Qazaq taǵamtaný ǵylymynyń kókjıegin keńeıtip, Dúnıejúzilik densaýlyq saqtaý uıymy, IýNISEF jáne basqa da halyqaralyq uıymdarmen yntymaqtastyq baılanys ornata bildi. Óziniń jańasha mektebin qalyptastyryp, ulaǵatty urpaq tárbıeledi. Aınalasyna syıly, ǵıbratty ǵumyr keshken Tóregeldi Sharmanulynyń jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn", - dep jazylǵan jedelhatta.

Eske salaıyq, buǵan deıin El ishinde ult arystarynyń izbasary, tulpardyń tuıaǵy, asyldyń synyǵy sanalatyn orasan zor qurmetke ıe aqsaqal, medısına ǵylymdarynyń doktory, profesor, gıgıenıst-nýtrısıolog ǵalym, Qazaqstannyń eńbek sińirgen qaıratkeri, akademık Tóregeldi Sharmanov 94 jasqa qaraǵan shaǵynda ómirden ótkenin habarlaǵan edik.

Bul maqala týraly ne oılaısyz?