Tiri bolsam, qazaqqa qyzmet etpeı qoımaımyn!

Álıhan Bókeıhan

Maıqaıyń turǵyndary bılikten basqa jerge kóshirýdi talap etýde

27 mamyr 2024 437

Pavlodar oblysy Maıqaıyń kenti mańyndaǵy "Shanhaı" aýdanynyń halqy ózderin kóshirýdi bılikten talap etip otyr. Olar qańtardyń basynda qaza tapqan qutqarýshylar mingen avtobýs sekildi óz úıleri de jer astynda qala ma dep qorqady. Turǵyndar ótinishine áli kúnge eshkimnen mardymdy jaýap bolǵan joq dep jazady Alash.kz.

Qaıǵyly oqıǵadan keıin Pavlodar oblysyndaǵy Maıqaıyń kenti búkil elge tanyldy deıdi Azattyq radıosy. Qańtar aıynyń basynda Maıqaıyńda altyn óndiretin shahtanyń tazartý keńistigi ornalasqan jer opyrylyp, saldarynan tórt adam qaza tapqan-dy.

Qazir óndiris toqtap tur. Áıtse de jer qoınaýyn paıdalanýshy "Maıqaıyń altyn" kompanıasy jumysty qaıta jandandyrý múmkindigin qarastyryp jatqanyn aıtady.

Maıqaıyńnyń jumysy shahtaǵa tolyq táýeldi. Biraq kent halqynyń kóbi jumysty qaıta jandandyrýy múmkin dep qorqyp otyr.

Ásirese kentke jaqyn turatyn adamdardyń ýaıymy qatty. Óıtkeni týra solardyń úılerine jaqyn mańda topyraq opyrylǵan. Adamdar respýblıkalyq kásibı áskerı apattyq-qutqarý qyzmetiniń qutqarýshylary sıaqty tirideı opat bolamyz ba dep qorqady. Qutqarýshylar mingen avtobýs 4 qańtarǵa qaraǵan túni bos keńistikke qulap ketken edi.

Altynnyń ústinde otyrsa da, kenttiń jaǵdaıy tym múshkil. Kenttiń eski bóligi – "Shanhaı" aýdany qańtarda opyrylǵan tustan nebári 500 metr jerde ornalasqan.

"Shanhaıdaǵy" ıesiz qalǵan keıbir úıler qırap, qańyrap tur. Biraq aýdanda áli de adam kóp turady.

Bul maqala týraly ne oılaısyz?