Tiri bolsam, qazaqqa qyzmet etpeı qoımaımyn!

Álıhan Bókeıhan

Máýlen Áshimbaevtyń Qazaqstan ekonomıkasynyń damýyna kóńili nege tolmaıdy?

24 mamyr 2024 469

Qazaqstan ekonomıkasy áli taý-ken jáne munaı salasyna, shıkizat baǵasyna jáne tómen deńgeıde óńdelgen taýarlar eksportyna táýeldi. Bul týraly Senat tóraǵasy Máýlen Áshimbaev málimdedi, dep habarlaıdy Alash.kz.

Senatta «Memleket basshysynyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyn iske asyrý sheńberinde Qazaqstanda ekonomıkanyń óńdeýshi sektoryn damytý» taqyryby boıynsha parlamenttik tyńdaý ótip jatyr.

Palata tóraǵasynyń aıtýynsha, salada kadr máselesi áli de ózekti.

Qazir óńdeýshi sektorda shamamen 613 myń adam jumys isteıdi (jumyspen qamtylǵandardyń 6,7%-y). Sońǵy 10 jylda saladaǵy jumysshylar sany nebári 10% ósti. Kóptegen baǵyt boıynsha bilikti mamandar jetispeıdi. Qazir tıisti qurylymdar tarapynan sheshimder qabyldanyp jatqanyn bilemiz. Bul jumysty kúsheıtý kerek, - dedi Máýlen Áshimbaev.

Sondaı-aq Máýlen Áshimbaev óńdeýshi kásiporyndarǵa beriletin kredıt paıyzy óte joǵary ekenin jáne bul salanyń damýyna keri áser etip otyrǵanyn atap ótti.

«Saladaǵy kóptegen adamdy tolǵandyratyn taǵy bir ózekti máseleniń biri – qarjylandyrýǵa qol jetkizý. Qazir qarjy naryǵyndaǵy kredıtteý mólsherlemesi 22%-ǵa deıin jetedi. Bul sýbsıdıa bólinýine qaramastan óńdeýshi sektordaǵy kásiporyndardyń damýyna keri áser etedi. 2022 jyldyń basynan bıyl sáýirge deıin bankterdiń jalpy bıznesti nesıelendirýdegi úlesi 51%-dan 43%-ǵa deıin, al óńdeýshi ónerkásipti nesıeleý 14%-dan 12%-ǵa deıin tómendedi», - dedi Senat tóraǵasy.

Máýlen Áshimbaev qazirgi Qazaqstan ekonomıkasynyń damýyna kóńili tolmaıtynyn ashyq aıtty.

«El ekonomıkasyna áli de bolsa taý-ken jáne munaı salasyna, shıkizat baǵasyna jáne tómen deńgeıde óńdelgen taýarlar eksportyna táýeldi bolyp otyrǵany jasyryn emes. Memleket basshysy osyǵan baılanysty aldaǵy aýqymdy mindentterdi belgilep berdi. Sony eskerip, ekonomıkanyń óńdeýshi sektoryn damytýǵa arnalǵan tyń jáne tıimdi sheshimder qajet dep esepteımiz. Bul baǵytta senatorlar óz tarapynan zańnamalyq turǵydan tıisti qoldaý kórsetip, belsendi jumys isteýge daıyn», - dep sózin túıindedi ol.

Bul maqala týraly ne oılaısyz?