Lıtva 22 mamyrdan bastap Reseıden elektr energıasyn ımorttaýdy toqtatty. Bul jóninde Lıtva elektr energıasynyń operatory Litgrid habarlady.
Lıtva Baltyq jaǵalaýy elderiniń arasynda Reseı elektr energıasyn satyp alýdan bas tartqan sońǵy, al Reseı munaıy men gazynan jáne elektr energıasynan tolyq bas tartqan alǵashqy el boldy.
Litgrid habaryna qaraǵanda, Lıtva munan bylaı ózi óndirgen jáne Shvesıa, Polsha men Latvıadan ımporttaǵan elektr energıasyn paıdalanady. "Atalǵan elder ótken jyly Lıtvaǵa kerekti elektr energıanyń 80 paıyzyn berip kelgen edi" dep habarlaıdy DW.
Lıtva Reseı qýat kózderine táýeldilikten tolyq arylǵanyn "asa mańyzdy beles" jáne "Reseımen soǵysyp jatqan Ýkraınany qoldaý" dep baǵalady. Lıtva energetıka mınıstri Daınús Kreıvıstiń "Aqshamyzdyń Reseıdiń áskerin kúsheıtýge jumsalǵanyn qalamaımyz" degen sózin Delfi jańalyqtar portaly taratty.
Lıtva "jasyl" energetıka esebinen keleshekte elektr engergıasyn eksporttaýshy elge aınalǵysy keledi.
Reseı Ýkraınaǵa basyp kirgen soń Eýropa odaǵy salǵan sanksıalar arasynda Reseıden kómir ımporttaýǵa bolmaıtyny da kórsetilgen. Qazir sanksıanyń altynshy paketi qarastyrylyp jatyr. Bul sanksıada Reseı munaıyna embargo salý máselesi qarastyrylýy múmkin. Ázirge oǵan Reseı munaıyna táýeldi Vengrıa kedergi bolyp otyr.
