Reseı Ýkraınanyń ońtústigindegi Herson qalasynda 2014 jylǵy "senarıin" qaıtalap, táýelsizdik "referendýmyn" ótkizýdi josparlap otyr. Ýkraına syrtqy ister mınıstri Dmıtrıı Kýleba osylaı dep málimdedi.
Herson Qara teńizge quıatyn Dnepr ózeni mańyndaǵy portty qala. Bul qala 2014 jyly Reseı jaýlap alǵan Qyrymǵa da jaqyn. Kreml osylaısha Hersondy Reseı men Qyrym arasyn jalǵaıtyn qurlyq ústi kópir jasaýdy kózdep otyrǵan bolýy múmkin.
Reseı áskeri osy aıdyń basynda Hersondy basyp alǵan, biraq jergilikti halyqtan qoldaý tappaǵan. Qala turǵyndary Reseı agresıasyna qarsy narazylyqty jalǵastyryp keledi.
Herson aımaqtyq keńesiniń depýtaty Sergıı Glan osyǵan deıin reseılikterdiń ózi men ózge de depýtattarǵa habarlasyp, "Herson halyq respýbıkasyn" qurýǵa "qoldaý" bildirýge shaqyrǵanyn aıtqan. Glannyń aıtýynsha, ol odan túbegeıli bas tartyp, ózge depýtattardy da reseılikterdiń "usynysyn" qabyldamaýǵa shaqyrǵan.
Máskeý 2014 jyly aqpanda Qyrym túbegine ásker kirgizip, "referendým" ótkizip, Qyrymdy aneksıalaǵan edi. Ýkraına men dúnıejúzi memleketteriniń basym kópshiligi bul áreketti aıyptaǵan.
