Tiri bolsam, qazaqqa qyzmet etpeı qoımaımyn!

Álıhan Bókeıhan

Jalǵyz qyzymdy aıaýsyz óltirdi: Marqumnyń ákesi qoǵamnan kómek surady

16 mamyr 2024 413

Óz páterinde aıaýsyz óltirilgen dáriger qyzdyń isi ákesiniń aıtýynsha burmalanyp ketýdiń sál-aq aldynda tur.

Móldir Tumanovanyń ákesi halyqtan kómek suraıdy. Ol qoǵamnan jalǵyz qyzynyń ólimine kináli adam qatań jazaǵa tartylýyn baqylaýdy ótindi. Bul týraly Alash.kz nur.kz saıtyna silteme jasap habarlady.

Marqumnyń ákesi qyzylordalyq Qaldybaı Tomarov Aqtóbede turǵan qyzymen sońǵy ret telefon arqyly sóılesken sátin esine aldy.

"Bul jaǵdaı Aqtóbede boldy. Qyzym sol jaqta 10 jyl oqydy. Medısınalyq ýnıversıtetke memlekettik grantpen tústi. Oqýyn bitirip, sol jaqqa jumysqa kirdi. Qyzymmen oqıǵa bolǵan kúni keshki ýaqytta sóılesken edim. Saǵat 23:30 shamasynda habarlastyq. Qyzym Toyota Corolla degen kóligin satqanyn, Qyzylordaǵa bılet alyp qoıǵanyn, úıge qaıtatynyn aıtty. "Erteń keshke meni poıyzdan kútip al" dep qoshtasyp edi. Bul sońǵy ret sóıleskenim eken. Erteńine denesin ǵana kórdim", - dedi Qaldybaı Tomarov.

Qaza bolǵan dárigerdiń týystaryna qaıǵyly habardy polısıa jetkizgen. Dárigerdiń ákesi qyzynyń basynan ótken oqıǵany Bıshimbaev isimen salystyrdy.

"Erteńine nemerelerimdi balabaqshaǵa aparyp, úıdiń tirligimen júrdim. Telefonyma habarlama keldi. Áldekimniń aty-jóni jazylǵan. "Sizder myna adamdy tanısyzdar ma?" dep jazylyp turdy. Biz ony tanymaımyz, túsingen joqpyz. Shamaly ýaqyttan keıin polısıa qyzmetkeri qońyraý shalyp "Aqtóbege kelýińiz kerek, qyzyńyz qaıtys boldy" dep habarlady. Tóbemnen jaı túskendeı boldy. Ý-shý boldyq. Aǵaıyndar jınalyp, eki kólikpen jolǵa shyqtyq. Túnde jettik. Áriptesteri kútip aldy. Birge jumys istegen áriptesteri máıithanada jatqan qyzymdy kórsetti. Júreginiń tusynda saý jer joq. Aıaýsyz pyshaq salǵan. Basyna da pyshaq kirgen. Úıge ákelgende de deneni ashyp kórdim. Basy men júreginiń tusynan ura bergen. Úıge bir kún qondyryp, jer qoınyna tapsyrdyq. Bıshimbaevtyń isi oıynshyq bop qalady. Biz qan jylap otyrmyz", - dedi ákesi. 

Jalǵyz qyzynan aıyrylyp, qara jamylǵan áke kóz jasyna erik berdi. Qazir marqumnyń anasynyń da densaýlyǵy syr bergen.

"Men úshinshi top múgedegimin. 2005 jyly ınfarkt alǵanmyn. Sodan keıin densaýlyq bolmaı qaldy. Myna jaǵdaı bizdi eseńgiretip jiberdi. Bir ul, bir qyzym bar-tuǵyn… Jalǵyz qyzym… Qazir anasynyń da densaýlyǵy nasharlap ketti. Osy iske qoǵamnyń qadaǵalaýy kúsheıse eken. Ózim áleýmettik jelide paraqsha ashyp qoıdym. Óz qoly ózine jetip, eńbek etip júrgen jalǵyz qyzymyzdy aıaýsyz óltirdi. Oǵan qatań jaza taǵaıyndalǵanyn talap etemiz. Olarǵa taǵaıyndalǵan jaza da aıaýsyz bolýy kerek. Qoǵam belsendilerinen kómek suraımyz. Jaǵdaıdyń burmalanbaýyn, qatań jazalaýyn baqylaýǵa alsa eken", - dedi marqumnyń ákesi.

 

Bul maqala týraly ne oılaısyz?