Tiri bolsam, qazaqqa qyzmet etpeı qoımaımyn!

Álıhan Bókeıhan

Endi zań jobasynyń barlyǵy tek qazaq tilinde qabyldana ma?

28 mamyr 2024 321

Ádilet mınıstrligi normatıvtik quqyqtyq aktilerdiń jobalaryn orys tiline aýdarýdy qamtamasyz ete otyryp, qazaq tilinde ázirleý tájirıbesin engizbekshi, dep habarlaıdy Alash.kz Kursiv saıtyna silteme jasap.

Bul jaıly 27 mamyr kúni Memlekettik til saıasatyn iske asyrý jónindegi komısıanyń otyrysnda Ádilet mınıstri Azamat Esqaraev aıtty.

«Memlekettik tilde zań ázirleý máselesi týraly» baıandama oqyǵan mınıstr qazaq tilin odan ári damytý maqsatynda normatıvtik quqyqtyq aktilerdiń jobalaryn orys tiline aýdarýdy qamtamasyz ete otyryp, olardy qazaq tilinde ázirleý mindetin kezeń-kezeńimen zańnamalyq negizde bekitý múmkindikteri pysyqtalyp jatqanyn aıtty.

Ol til máselesin damytý úshin eki baǵyttaǵy jumystardy júzege asyrý mańyzdy dep sanaıdy.

Birinshi baǵyt – termınologıa máselesin sheshý. Zańnamalyq aktilerdiń mátinine qoıylatyn talaptardyń biri – termınderdiń birizdiligi. Esqaraev Respýblıkalyq termınologıalyq komısıa bekitken termınder usynymdyq sıpatqa ıe ekenin, sondyqtan, is júzinde, Komısıa maquldaǵannan keıin de, zańgerler men fılologtar arasynda bir termındi ártúrli etip aýdarý tóńireginde pikirtalastar jıi týyndaıtynyn aıtady. Sondyqtan da qazaqsha termınologıalyq sózdikterge resmı mártebe berý jáne olardy normashyǵarý prosesinde qoldanýdyń mindettiligin engizý qajet dep sanaıdy.

Al ekinshi baǵyt – tıisti uıymdastyrýshylyq sharalardy qabyldaý. Osy maqsatta mınıstrlik zań jobalaryn memlekettik tilde ázirleý boıynsha mamandardan zańgerlerden jáne ǵalymdardan quralǵan pýl tizimin qalyptastyrylǵan. Bolashaqta sol mamandardy zań jobalaryn ázirleý prosesine tartý kózdelip otyr.

«Qazaq tili zań jazýǵa, normatıvtik qujattardy túzeýge «ıkemsiz» degen túsinikten arylyp, memlekettik tildiń mol múmkindigin keńinen paıdalaný qajet. Aldaǵy ýaqytta bul máselede jaqsy nátıjelerge qol jetkizetinimizge senimdimin»,- dedi mınıstr.

Bul maqala týraly ne oılaısyz?