Búgin Parlament Májilisiniń kezekti otyrysynda depýtat Abzal Quspan halyq qalaýlylary atynan premer-mınıstr Oljas Bektenovke depýtattyq saýal joldady.
Ol memleket basshysy Qasym-Jomart Toqaevtyń Eltańbany ózgertý týraly usynysyna qatysty oıyn aıshyq aıtty.
«Ulttyq Quryltaı – irgeli eldik máseleler ortaǵa salynatyn, ıdeologıalyq baǵdarymyz talqylanatyn alqaly alań. Osyǵan oraı kúni keshe Atyraýda ótken Ulttyq quryltaıda ult ómirine qatysty kóptegen mańyzdy máselemen qatar, eldigimizdiń aıshyqty belgisi – gerb máselesiniń de kóterilýi oryndy. Bul usynys qoǵamnyń qyzyǵýshylyǵyn týǵyzyp, qyzý talqylanýda. Olardyń bir toby qoldanystaǵy gerbti osy qalpynda qaldyraıyq dese, endi biri zaman talabyna saı ózgerteıik deıdi. Bul – zańdy ári oń qubylys. Azamattyq qoǵamnyń belsendiligi men jetilgeniniń kórinisi. Ekinshi jaǵynan, jurtshylyqtyń eldik nyshandarǵa beı-jaı qaramaıtynyn, otanshyldyq seziminiń joǵarylyǵyn aıqyn ańǵartady», – dedi Abzal Quspan.
Onyń aıtýynsha, álemdik tájirıbege súıensek, memleket Eltańbasy sol eldiń tereń tarıhymen, tól dúnıetanymymen jáne alǵa qoıǵan muratymen tyǵyz baılanysty bolady. Gerb ataýynyń ózi «mura» degen uǵymdy bildiredi. Al keıbir elder gerbsiz, emblemamen ǵana shektelgen.
Bul rette bizdiń halqymyzdyń tarıhy da eldik nyshandar bederleý tájirıbesine baı. Tamyryn saq, ǵun, túrik qaǵanaty zamanynan tartatyn tańbalarymyz – jalpy Eltańbanyń túpatasy deýge tolyq negiz bar.
«Ras, qoldanystaǵy gerbimiz de jaqsy jasalǵan. Ultymyzǵa tán qasterli belgilermen birlik pen beıbitshilikti aıshyqtaýdy maqsat tutqan. Ol osy kezeńniń ereksheligi men suranysyna saı el halqyn biriktirýshilik qyzmetin múltiksiz atqaryp keledi. Bul rette Qazaq memleketi 1991 jyly ǵana paıda bolmaǵanyn, onyń memlekettilik tarıhynyń tereńde jatqanyn da eskergenimiz jón. Ol – arǵydaǵy Saq, Ǵun, Túrik qaǵanaty, Ulyq Ulys – Joshy ulysynyń, bergidegi Qazaq handyǵynyń tikeleı murageri. Bul – erlik pen órlikke toly tarıh. Bıyl qazaq dalasynda tý kótergen Joshy ulysy – Altyn Ordanyń qurylǵanyna 800 jyl tolýyn atap ótkeli otyrmyz. Mine, Qazaq eliniń osyndaı tereń tarıhı sabaqtastyǵy, jaýynger ata-babalarymyzdyń asqaq rýhy, memlekettiliktiń susy men sesi, ataǵy men aıbyny gerbte kórinis tapsa ıgi. Sondyqtan aldaǵy ýaqytta osy baǵytta kóp bolyp keńesý artyqtyq etpeıdi», – dedi depýtat.
Sózin qorytyndylaı kele, Abzal Quspan prezıdenttiń Eltańbany qoǵammen talqylaý týraly bastamasyn qoldaı otyryp, kópshilikpen, tıisti mamandarmen, qoldanystaǵy Eltańba avtorymen jan-jaqty talqylaý uıymdastyrýdy usyndy.
