Májilis depýtaty Amanjol Áltaı el aýmaǵyna jaıylǵan sý tasqynyna qatysty qatelik jibergen sheneýnikter jazalap, qyzmetinen alastaý keregin aıtty. Aldymen birinshi vıse-premer Roman Sklárdy sóz qyldy, dep habarlaıdy Alash.KZ ulttyq portaly.
«Eldi de, ózgeni de mezi qylǵan Roman Sklár sekildi baıaǵydan kele jatqandardy ornynan alastaıtyn ýaqyt keldi. Jalpy, sý tasqyny kezinde aqıqattyń ózi betin ashyp bergendeı, jergilikti bılik ókilderi men úkimettiń arasynda baılanys joq ekenin baıqadyq. Sonymen qatar bizdegi mınıstrlikterdiń arasynda da tyǵyz áriptestik ornamaǵan», - deıdi depýtat.
Depýtat mundaı apatty jaǵdaılar jáne tasqynmen kúresýde tótenshe jaǵdaı mınıstrligi, sý mınıstrligi, aýyl sharýashylyǵy mınıstrligi sekildi memlekettik organdar bir-birimen kelise otyryp, kúsh biriktirip jumys isteý kerek dep sanaıtynyn jetkizdi.
«Ókinishke qaraı, bizde ondaı júıe qalyptaspaǵan. Keńes úkimeti kezindeginiń bárin jamandaı bermeýimiz kerek. Óıtkeni sol tusta ásirese, gıdratsıa salasynda myqty mamandar boldy. Naqty júıe boldy. Kóktemgi sý tasqyna bir jyl buryn kúz aıynan beri daıyndyq sharalary júıeli júrgizildi. Qazirgi kezde eshteńege jaýap bergimiz kelmeıdi. Qys kelip qardyń astynda qalsaq ta, eshkim jaýapsyz. Kóktem kelip, sý apaty bolsa da eshkim jaýap berýge qulyqsyz. Tabıǵattyń tosyn jaǵdaıy dep qutylyp ketedi. Bulaı aýzymyzdy qurǵaq shóppen súrtip otyra bergenimiz jaramaıdy», - deıdi Amanjol Áltaı.
