Tiri bolsam, qazaqqa qyzmet etpeı qoımaımyn!

Álıhan Bókeıhan

"Dala qyrandary" jastar qoǵamdyq birlestigimen yntymaqtastyq týraly memorandým: sý basqan aýyl turǵyndaryna qalaı kómektesýge bolady

12 sáýir 2024 271
Sý tasqynynan zardap shekkenderge kómek kórsetý boıynsha kezdesý Týrızm jáne sport mınıstrliginiń qabyrǵasynda ótti, dep habarlaıdy madeniportal.kz.
İs-sharaǵa qoǵamdyq birlestiktiń ókilderinen grek-rım kúresiniń balýany Ashat Dilmuhamedov, aralas jekpe-jekten álem chempıony Vasılıı Tahtaı, «Qazaq Kuresi» Asosıasıasynyń bas dırektory Damır Bekbosynov, «Dala qyrandary» JQB dırektory Mádı Rymjanov, mınıstrlik tarapynan Týrızm jáne sport mınıstri Ermek Marjyqpaev, Sport jáne dene shynyqtyrý isteri komıtetiniń tóraǵasy Erbol Myrzabosynov qatysty.
 
 
Sý tasqynynan zardap shekkenderge kómek kórsetý boıynsha sportshylardyń eriktiler qataryna qosylýyn talqylaý barysynda «Dala qyrandary» jastar qoǵamdyq birlestigi men Týrızm jáne sport mınıstrligi arasynda yntymaqtastyq týraly Memorandýmǵa qol qoıyldy.
 
«Eń aldymen qazirgi qıyn kezeńde kórsetken izgi amal, jaqsy nıet, qajyrly eńbek úshin sizderge alǵys aıtqym keledi! Biz sizdermen maqtanamyz jáne yntymaqtastyq ornatqanymyzǵa qýanyshtymyz. Kásibılikterińizdi árqashan joǵary baǵalaımyz. Sizder tózimdiliktiń, aqkóńildiktiń jáne erlerge tán qasıettiń jarqyn úlgisin kórsetip júrsizder», - dedi mınıstr.
 
Esterińizge sala keteıik, sport qaýymdastyǵy «Dala qyrandary» jastar qoǵamdyq birlestigi ókilderimen birlesip, sý tasqynynan zardap shekken óńirlerge gýmanıtarlyq kómek kórsetýde. Sonymen qatar olar qutqarýshylar men jergilikti atqarýshy organdarǵa sýdy soryp, sý basyp qalǵan joldardy tazalap, topyraq tastaýǵa kómektesedi.
Bul maqala týraly ne oılaısyz?