Tiri bolsam, qazaqqa qyzmet etpeı qoımaımyn!

Álıhan Bókeıhan

"Cherchesov Reseıde kerek bolmaı qalǵan maman": Qazaqstan quramasynyń bas bapkerine syn kóp

04 maýsym 2024 636

Reseıdiń 60 jastaǵy fýtbol mamany Stanıslav Cherchesov Qazaqstan quramasynyń bas bapkeri bolyp taǵaıyndaldy. Cherchesovtyń jalaqysy jaıly taraǵan ınsaıt aqparat jurt narazylyǵyna túrtki bolyp, mamannyń biliktiligine qatysty da pikirtalas kúsheıdi dep habarlaıdy Alash.kz.

Bul qarsylyqqa ne sebep? Cherchesovtyń múmkindikteri qandaı? "Azattyq" osy saýaldarǵa jaýap izdep kóripti.

Jalaqy aınalasyndaǵy daý

3 maýsymda Qazaqstan fýtbol federasıasy (QFF) Stanıslav Cherchesovpen kelisim-shartqa qol qoıǵanyn resmı málimdedi. Al quramany osyǵan deıin jattyqtyrǵan taǵy bir reseılik maman Magomed Adıev pen QFF "eki jaqty kelisimmen" jumysty aıaqtaǵan. Biraq QFF saıtyndaǵy aqparatta Cherchesovpen qansha jylǵa kelisim-shartqa qol qoıylǵany, jalaqysy jaıly aqparat joq.

Ótken aptada qazaqstandyq basylymdarda "Cherchesov Qazaqstan quramasyn jattyqtyrady jáne jylyna 1,2 mln eýro (581 mln 750 myń teńge) jalaqy alady" degen aqparat taraǵan edi. Osydan soń jeli qoldanýshylarynyń bir bóligi Cherchesovtyń jalaqysynyń kóp ekenin aıtyp, synǵa alǵan.

Jelide qarsylyq kúsheıgen tusta QFF Cherchesovtyń "jalaqysy týraly aqparat asyra kórsetilgen jáne shynaıylyqqa sáıkes kelmeıdi", "jalaqysy búdjet tarapynan qarjylandyrmaıdy" dep málimdedi. Buǵan qosa, federasıa kelisim-sharttyń qupıalyǵyna baılanysty "jalaqy kólemi jarıa etilmeıtinin" de habarlady.

Al reseılik jáne qazaqstandyq sport saıttary Cherchesov Qazaqstanmen 2+1 júıesimen kelisim-shartqa qol qoıylǵanyn jazdy. Iaǵnı, Cherchesov Qazaqstan quramasyn eki jyl jattyqtyrady, eger jaqsy nátıje kórsetse, taǵy bir jyl jumys isteıdi. Reseılik maman Qazaqstan quramasyn bıyl kúzde bastalatyn Ulttar lıgasyna daıyndaıdy. Odan soń 2026 jylǵy álem chempıonatyna irikteý týrnırin ótkizýi múmkin.

Fýtbol komentatory, "Birinshi bol" sport podkastynyń júrgizýshisi Oljas Baıbosynov "jalaqy týraly aqparat halyqtyń shamyna tıgenin" aıtady.

- Qazaqstanda 1,2 mln eýro aılyq alý múmkin be degen suraq týyndaıdy. Shalǵaıdaǵy aýylda jatqan halyq mundaı aılyqty ustap kórmegen de. Jalpy Cherchesovtyń osynshama aılyq alady degeni naqty aqparat emes, biraq báribir osyndaı aqparat halyqty ashýlandyrady. Qarsylyqtyń bir sebebi – osy, – deıdi ol.

Al qazaqstandyq fýtbol jýrnalısi, buryn QFF-da baspasóz hatshy bolǵan Erbol Kaırov "qalaı bolǵanda da QFF bapkerdiń jalaqysyn demeýshilerdiń aqshasyna, FIFA men UEFA-dan bólinetin qarjydan tóleıtinin" aıtady.

Qazaqstan quramasynyń oıyndarynan habar taratyp júrgen sport jýrnalısi Bek Tóleý "Cherchesov tómen jalaqyǵa kele qoımaıtyn maman" dep sanaıdy. Ol "bapkerdiń jalaqysy búdjetten tólense jarıalanýy tıis bolady, biraq QFF bapkerdiń jalaqysyn búdjetten tólemeıdi, mundaı kezde olarǵa eshkim eshteńe aıta almaıdy" deıdi.

CHERCHESOVTYŃ MÚMKİNDİGİ QANDAI?

Cherchesov Sovet odaǵy kezinde fýtbolshy bolǵan, keıin bapkerlikke aýysqan. Jattyqtyrýshy karerasyn Avstrıa klýbtarynda bastap, keıin Máskeýdiń "Spartak", "Dınamo" komandalaryn jattyqtyrdy. Al 2018 jyly Reseıde ótken álem chempıonatynda Reseı quramasyn shırek fınalǵa shyǵarǵan. Álem kýbogynda Saýd Arabıasy, Egıpetti, Ispanıany jeńip, shırek fınalda Horvatıadan penaltıden jeńilgen edi. Fýtbol komentatory Oljas Baıbosynov "Cherchesovtyń jankúıer esinde qalǵan jalǵyz jetistigi osy álem kýbogynyń shırek fınaly" dep sanaıdy.

- Cherchesov Reseıde kerek bolmaı qalǵan maman. Biraq keıingi jyldary Reseıde eshqandaı jumys istep jatqan joq. Ony jumysqa shaqyrmaıdy. Nege biz suranysqa ıe bolmaı qalǵan adamdy alyp kele beremiz? "Ulttyq qurama deńgeıinde jumys isteıtin basqa da mamandar joq pa? Eýropadan nege alyp kelmeıdi?" degen saýal týyndaıdy. Óıtkeni biz erte me, kesh pe eýropalyq fýtbol oınaýǵa kóshýimiz kerek. Qashanǵy keńes dáýirinde qalǵan fýtboldy oınaı beremiz? – deıdi Baıbosynov.

Erbol Kaırov ta Qazaqstan Reseıden bapker shaqyrýdy qysqartyp, eýropalyq mamandarǵa kóńil bólý kerek dep esepteıdi.

- Eýropadan, Germanıadan myqty bapkerler ákelýge bolady. Sebebi sonda ǵana biz fýtbol mentalıtetimizdi ózgertemiz, fýtbol júıemiz basqasha jumys isteı bastaıdy, - deıdi ol.

Al Bek Tóleý "jumyssyz júrgen reseılik mamandardyń Qazaqstanǵa kelýi tendensıaǵa aınalyp bara jatqanyn jankúıerler narazy" dep esepteıdi.

- "Qaırat" fýtbol klýbyna reseılik Aleksandr Kerjakov, "Aqtóbege" reseılik Dmıtrıı Parfenov keldi. Endi mine, Cherchesov taǵaıyndaldy. Osynyń bárine jankúıerlerdi ekiudaı kúıde qaldyryp jatyr, - deıdi ol.

Cherchesovtyń ózi Qazaqstan quramasyna bas bapker bolyp taǵaıyndalǵanyna qatysty resmı pikir bildirgen joq. Ol bastaǵan Qazaqstan quramasy qyrkúıekte Ulttar lıgasy jarysyn bastaıdy. Qazaqstan V dıvızonynanda Norvegıa, Avstrıa jáne Slovenıamen oınaıdy. Fýtbol komentatory Oljas Baıbosynov bul týrnır Cherchesov úshin úlken synaq bolady dep sanaıdy.

- Qurama ulttar lıgasynda kóp jeńilse, Cherchesov synnyń astynda qalady. Bul syndy kótere ala ma, alda QFF ne sheshedi? Ony ýaqyt kórsetedi, - deıdi ol.

 

Bul maqala týraly ne oılaısyz?