Tiri bolsam, qazaqqa qyzmet etpeı qoımaımyn!

Álıhan Bókeıhan

Bıshimbaev qashan, qandaı úkim shyǵady?

13 mamyr 2024 502

Jábirlenýshi taraptyń advokaty Janna Orazbahova eks-mınıstr Qýandyq Bıshimbaevqa qatysty úkim qashan shyǵýy múmkin ekenin aıtty.

Orazbahovanyń sózinshe, búgin úkim shyǵý yqtımaldyǵy - 70-ke 30 paıyz.

"Munyń bári (sýdıa - esk.) keńesý bólmesinde qansha ýaqyt bolatynyna baılanysty. Daýystardy sanaıdy. Daýystardy sanaǵannan keıin sýdıa úkimdi, qarar bóligin jazady. Iaǵnı, bul da belgili bir ýaqyt alady", - dep túsindirdi ol.

Aıta keteıik, Astana qalasynyń mamandandyrylǵan aýdanaralyq sotynda Qýandyq Bıshimbaevqa qatysty qylmystyq is boıynsha birneshe sot otyrysy ótti. Ony dúıim jurt Joǵarǵy sottyń YouTube arnasynan onlaın qarady.

Azamattyq nekedegi áıeli Saltanat Núkenovany óltirdi degen aıyppen sottalyp jatqan eks-mınıstr Qýandyq Bıshimbaevty advokat Leıla Ramazanova, Nazken Qusaıynova, Erlan Ǵazymjanovtar qorǵap jatyr.

Al marqum Saltanat Núkenovanyń aǵasy Aıtbek Amangeldi men onyń otbasynyń advokattary – Janna Orazbahova men Álıa Omarova.

27 naýryzda eks-mınıstr Qýandyq Bıshimbaevtyń isi boıynsha alqabıler tańdalǵan edi. Alqabıler alqasyna 12 adam irikteldi: 10 – negizgi quram, 2 – qosalqy. Sodan keıin ashyq sot otyrystary bastaldy.

Sonymen qatar, Qýandyq Bıshimbaev sotta Saltanat Núkenovany asa qatygezdikpen óltirgenin moıyndamady. Bul oqıǵa 2023 jyly 9 qarashada Astana qalasyndaǵy BAU meıramhanasynda boldy.

Bıshimbaevqa eki bap boıynsha aıyp taǵyldy:

  • asa qatygezdikpen kisi óltirý (15 jyldan 20 jylǵa deıin nemese ómir boıyna bas bostandyǵynan aıyrý);
  • qınaý (4 jyldan 7 jylǵa deıin bas bostandyǵyn shekteý nemese osy merzimge bas bostandyǵynan aıyrý).
Bul maqala týraly ne oılaısyz?