Tiri bolsam, qazaqqa qyzmet etpeı qoımaımyn!

Álıhan Bókeıhan

BUU: Reseı áskeri ýkraınalyq 32 tutqyndy óltirgen bolýy múmkin

27 naýryz 2024 245

2023 jylǵy 1 jeltoqsan men 2024 jylǵy 29 aqpan aralyǵynda Reseı áskerı qyzmetkerleri keminde ýkraınalyq 32 tutqyndy qarýyn tastaǵan kezde ne jaýap alý barysynda óltirgen bolýy múmkin. Bul týraly BUU adam quqyǵy jónindegi joǵarǵy komısary basqarmasynyń resmı saıtynda jarıalanǵan baıandamada aıtylǵan.

Baqylaý mısıasy tutqyndar óltirilgen 12 oqıǵa jóninde habarlama alǵan. BUU sarapshylary keminde úsh jaıtty táýelsiz rastaǵan, ol derekterde Ýkraına qarýly kúshteriniń jeti qyzmetkeri qaza bolǵany aıtylady.

Baıandamada Reseı kúshteriniń ýkraın tutqyndaryn azaptaǵany, sonyń ishinde uryp-soǵyp, elektr toǵyn qoldanǵany jáne jynystyq zorlyq-zombylyq jasaǵany egjeı-tegjeıli aıtylǵan.

Mısıa qyzmetkerleri Reseı tutqynynan jaqynda bosatylǵan ýkraınalyq 60 jaýyngerden jaýap alǵan. Olardyń arasynda birneshe aptadan eki jylǵa deıin tutqynda bolǵandar bar.

Baıandamada BUU sarapshylarynyń Ýkraınadaǵy reseılik 44 tutqynǵa saýalnama júrgizip, olardan azaptaý men qatygezdik týraly "senýge laıyq habar" alǵany jazylǵan. Reseılik tutqyndar turaqty ustaý oryndaryndaǵy azaptaý týraly aıtpasa da, olardyń kópshiligi tasymaldaý kezinde nemese tutqynǵa alynǵan soń birden azaptalǵanyn málimdegen.

Ýkraınada Reseı áskerı kúshteriniń tutqyndardy azaptaý jáne taǵy basqa qylmystary boıynsha 50 myńnan astam qylmystyq is tergelip jatyr. Reseı qorǵanys mınıstrligi mundaı aıyptaýlardy joqqa shyǵarady nemese túsinikteme bermeıdi.

Halyqaralyq zańdarǵa saı, tutqyndardy óltirý áskerı qylmys bolyp sanalady jáne eki eldiń zańynda da ondaı áreketke tyıym salynǵan.

Bul maqala týraly ne oılaısyz?