Áskerı ınfraqurylymdy damytý jáne Qarýly Kúshterdi, basqa da áskerler men áskerı quralymdardy qaıta jaraqtandyrý kezindegi zańdylyqtyń jaı-kúıi máselesi boıynsha Berik Asylovtyń tóraǵalyǵymen Bas prokýratýra alqasynyń otyrysy ótti.
İs-sharaǵa Qaýipsizdik Keńesiniń ókilderi, áskerı vedomstvolardyń, sondaı-aq ónerkásip jáne qurylys, İshki ister, tótenshe jaǵdaılar jáne qarjy mınıstrlikteriniń basshylary qatysty.
Bas Prokýror áskerı qyzmetshiler arasynda quqyq buzýshylyqtyń aldyn alý máseleleriniń ózektiligi men mańyzyn aıtty.
Bas áskerı prokýratýra (budan ári-BÁP) 2023 jyly áskerı qaýipsizdik salasyndaǵy zańdylyqtyń jaı-kúıine 363 tekserý jáne 153 taldaý júrgizdi.
Olardyń nátıjeleri boıynsha ártúrli jaýapkershilikke eki myńnan astam tulǵa tartyldy.
«Qadaǵalaý aktileri boıynsha «Áskerı qurylys Astana» JSHS-niń 4 myńǵa jýyq qyzmetkeriniń 270 mln teńgeden astam somaǵa jalaqysy bereshegi óteldi», – delingen habarlamada.
Qorǵanys mınıstrligi BÁP bastamasymen zattaı múliktiń sıfrlyq esebin engizýde.
Áskerdegi quqyq buzýshylyqtardyń aldyn alý maqsatynda 2022-2024 jyldarǵa arnalǵan áskerdegi quqyq buzýshylyqtardyń aldyn alýdyń úsh jyldyq baǵdarlamasy iske asyrylýda.
«Baǵdarlamany iske asyrý nátıjesinde 2023 jyly qylmystyq quqyq buzýshylyqtardyń 4,2% - ǵa, onyń ishinde asa aýyr quqyq buzýshylyqtardyń 30%-ǵa, aýyrlyǵy ortasha - 3,1%-ǵa, teris qylyqtardyń 24%-ǵa tómendeýine qol jetkizildi», – delingen Bas prokýratýranyń baspasóz qyzmeti taratqan aqparatta.
Otyrys barysynda oq-dárilerdi saqtaý máseleleri, sondaı-aq basqa da ózekti taqyryptar jeke talqylandy.
Sondaı-aq, Bas prokýratýranyń bastamasymen birneshe vedomstvoaralyq jumys toptaryn qurý týraly sheshim qabyldanyp, olar kún saıyn áskerı ınfraqurylymdy jaqsartýǵa jáne damytýǵa, áskerdi sapaly qaıta jaraqtandyrýǵa, sondaı-aq quqyq buzýshylyqtardyń aldyn alýǵa baǵyttalǵan sharalardy iske asyrýdy súıemeldeıtin bolady.
Onyń quramyna Bas prokýratýranyń jáne Bas áskerı prokýratýranyń, qorǵanys, tótenshe jaǵdaılar, qarjy, ónerkásip jáne qurylys mınıstrliginiń, sondaı-aq Ulttyq ulan men Shekara qyzmetiniń jaýapty ókilderi kiredi.
Alqa qorytyndysy boıynsha Bas prokýratýra áskerı vedomstvolardyń basshylaryna, múddeli memlekettik organdarǵa áskerı saladaǵy zań buzýshylyqtardy boldyrmaý boıynsha pármendi sharalar qabyldaý týraly usynymdar berdi.
Foto: Bas prokýratýra
