Tiri bolsam, qazaqqa qyzmet etpeı qoımaımyn!

Álıhan Bókeıhan

«Balapan» telearnasy respýblıkalyq balalar festıvalin ótkizdi

01 maýsym 2022 114
«Qazaqstan» respýblıkalyq teleradıokorporasıasy» AQ «Balapan» telearnasy Nur-Sultan qalasy ákimdigimen birlesip, «Balalar jyly» sheńberinde respýblıkalyq «BALAPAN ÁLEMİ» atty Open Air festıvalin ótkizdi. Merekelik shara 1 maýsym – Halyqaralyq balalardy qorǵaý kúni Nur-Sultan qalasynda, erke Esil jaǵasyndaǵy amfıteatrda ótti. Konserttik baǵdarlamada elimizdiń birneshe óńirinen kelgen 800-ge jýyq talantty bala jáne estrada juldyzdary óner kórsetti. Balalardy merekemen quttyqtap Qazaqstan Respýblıkasy Aqparat jáne qoǵamdyq damý mınıstri Asqar Omarov arnaıy keldi.



Mınıstr Asqar Omarov alǵy sózinde: Memleket basshysy Qasym-Jomart Toqaevtyń 2022 jyldy «Balalar jyly» dep belgilegeni málim.Prezıdent bul jyldy óskeleń urpaqtyń úılesimdi damýyna jan-jaqty qoldaý bildirip, olarǵa sapaly bilim men medısınalyq kómek kórsetý aıasynda memleket tarapynan naqty is-sharalar jasalýyn basa aıtty. Osy rette, konserttik baǵdarlamamen qatar, balalar úshin maǵynaly is-sharalar ótkizip otyrǵan «BALAPAN ÁLEMİ» balalar festıvaline qosh keldińizder deımin.

Budan bólek, mınıstr «Balalar jyly» aıasynda atqarylǵan is-sharalardy aıta kele, «Balapan» telearnasynyń efırden tys jasap júrgen jobalaryna toqtaldy: «Kontent jasaýdan bólek, balalar arnasy 2021 jyly áleýmettik mańyzdy «Erekshe qajettilikteri bar balalarǵa arnalǵan anımasıa mektebin» ashty. Joba erekshe balalarǵa anımasıany oqytyp, olardyń qoǵamnyń belsendi múshesi bolýyna jol ashady. Buǵan qosa, bıyl telearna zamanaýı balalar ánderine baıqaý jarıalady. Onyń jeńimpazdary da aldaǵy kúnderi jarıalanbaq. Bes jeńimpazǵa korporasıa tegin klıp túsirip, telearnalardan kórsetedi».

 

«Qazaqstan» telearnasymen birlese atqarylǵan konserttik baǵdarlamada Gúlnur Orazymbetova, Ushqyn Jamalbek, Nurlan Álimjandar ánnen shashý shashsa, Roza

Álqoja qyzy Iasına Aıdynqyzy jáne Jiger Aýypbaev shákirti Aıdos Kádenmen dýet qurdy.  Sondaı-aq, festıválde dombyranyń qulaǵynda oınaıtyn 100 baladan quralǵan qurama orkestr halyq kompozıtorlarynyń kúılerin oryndap, bı ansámblderi fleshmob bıledi. Balalar arnasynan túlep ushqan, búginde úlken sahnada júrgen tanymal ónerpazdar qonaq retinde kelip, quttyqtaýlaryn arnady.

Aıryqsha atap óterligi, festıválge kóp balaly jáne áleýmettik jaǵdaıy tómen otbasylardyń balalary men erekshe qajettilikteri bar búldirshinder qatysyp, ónerlerin ortaǵa saldy. Olardyń qatarynda Qaraǵandydan arnaıy kelgen, respýblıkalyq «Dombyra-Dastan» baıqaýynda bas júldeni jeńip alǵan kúıshi Nurdáýlet Saǵatbek te bar.

Sonymen qatar, amfıteatr aýmaǵynda ulttyq sport jáne oıyn-saýyq alańdary uıymdastyrylyp, túrli saıystar men asfáltqa sýret salý baıqaýy ótti. «Balapan» álemi» atty kitap kórmesi men astanalyq mektepishilik qolóner úıirmeleri men sheber balalar daıyndaǵan qolóner buıymdarynan jármeńke jaıyldy. Kóńildi anımatorlar men sırk ártisteri de festıválge kelgen merekeniń kórkin qyzdyrdy. Festıválge kelgen kishkentaı qala turǵyndary men qonaqtary barsha sharaǵa qyzyǵa qatysyp, tanymal ánshi jáne sportshylarmen estelikke sýretke tústi.



Elimizdiń barsha óńirindegi balalarǵa merekelik kóńil-kúı syılaý maqsatynda festıvál «Balapan» telearnasynan tikeleı efırde kórsetildi. Sonymen qatar, Ulytaý oblysy, Abaı oblysy, Mańǵystaý oblysy  jáne Qyzylorda oblysy ákimdikteriniń qoldaýymen balalarǵa arnalǵan is-sharalar uıymdastyrylyp, tikeleı baılanys arqyly qosyldy.

Aıta ketelik, saltanatty keshte «Balapan»-nyń jańa maýsymyndaǵy jańalyqtary aıtylyp, telearnanyń jańa beınesi tanystyryldy.

Atalǵan festıvál «Balapan» telearnasynyń «Balalar jyly» sheńberinde uıymdastyrǵan alǵashqy sharasy emes. Balalardyń súıikti arnasy bıyl budan bólek «Samǵa, Balapan»jáne «Balapan kóktemi» atty konsertter ótkizdi. Kógildir ekrannan kishkentaı kórermenderine daıyndaǵan bazarlyqtary da mol. Jańa televızıa maýsymynda balalardy otanshyldyqqa, baýyrmaldyqqa, bilim men ǵylymǵa baýlıtyn 22 mýlthıkaıa men telebaǵdarlamalar usynady.

 

 

 

 
Bul maqala týraly ne oılaısyz?