Reseı áskeri qorshaýǵa alǵan "Azovstal" zaýyty aýmaǵynda Ýkraınanyń 600-ge jýyq jaraly jaýyngeri bar. Bul jóninde ulttyq telemarafon efırinde 12-shi brıgadanyń komandıri Denıs Shlega habarlaǵan.
"Onyń sózinshe, 40-qa jýyq jaýyngerdiń jaǵdaıy óte aýyr. Medısına quraldary men dári-dármek jetpeıdi, jaǵdaı qıyn" dep jazady Azattyq radıosynyń Ýkraına redaksıasy.
Bul aqparatty 15 mamyrdaǵy onlaın-konferensıa kezinde "Azovstal" qorǵanysyndaǵy keıbir jaýyngerlerdiń áıelderi Ekaterına Prokopenko, Iýlıa Fedosúk, Anna Naýmenko men Dará Sıkýnovalar da rastady. Olardyń sózinshe, qorshaýdaǵy jaýyngerler kúnine bir stakan ǵana tehnıkalyq sý ishedi, azyq-túlik te taýsylýǵa jaqyndaǵan. Aýyr jaraly jaýyngerler dári-dármek jetpeı ólip jatyr, narkozsyz denesin kesken kezderi bolǵan.
Áıelder qorshaýdaǵy jaýyngerlerdi qutqarýǵa shaqyrdy. Olar Túrkıaǵa baryp, prezıdent Erdoǵanmen kezdeskisi keletinin, kúıeýlerin qutqarýǵa septesýdi suraǵysy keletindikterin aıtty.
"Nastoıashee Vremá" telearnasy "Azov" polkiniń (Ýkraına Ulttyq gvardıasy quramyna kiretin ońshyl erikti top) jaýyngeri Dmıtrıı Kozaskıımen baılanysty. Joǵarydaǵy aqparattardy ol da rastady. "Azyq-túlik pen sý ári ketkende bir aptaǵa jetetin shyǵar. Búgin túste sulynyń jarmasyn jedik, arasynda azdap sábiz boldy. Kúnine bir-aq ret tamaqtanamyz", – dedi Kozaskıı.
Dmıtrıı Kozaskıı sózinshe, qazir urys qımyldary zaýyt aýmaǵynda júrip jatyr. "Jaý aýyr artılerıasymen atyp, tanki men avıasıasyn qosyp jatyr. Bizdiń jaýyngerlerler barlyq shabýyldy toıtaryp otyr", – dedi "Azov" soldaty.
"Azovstal" metalýrgıa kombınaty – Ýkraına áskeriniń Marıýpoldegi sońǵy tiregi. Qalanyń basym bóligin Reseı áskeri baqylaýyna alǵan.
Ýkraına zaýyt qorǵanysyndaǵy jaýyngerlerin evakýasıalaýǵa tyrysyp otyr. Tipti olady úshinshi elge jiberýdi de usynyp kórdi. Mundaı usynysty Túrkıa da aıtqan. Alaıda Reseı "olar berilýge tıis" dep sanaıdy. Qazir aýyr jaralanǵandardy Reseı tutqyndarymen aıyrbastaý jóninde kelissóz júrip jatyr.
