Tiri bolsam, qazaqqa qyzmet etpeı qoımaımyn!

Álıhan Bókeıhan

Atyraýda apat: Shápkenov qalaı at shaptyrady?

19 sáýir 2024 422
 

Qazir jurt tasqyn sýdyń ekinshi tolqynyna daıyndyq ústinde, Reseıden keletin topanǵa daıyndalyp, ábiger. Osyndaı qıyn-qystaý shaqta Atyraý oblysynyń ákimdigi «Uly dala tulpary» atty alaman báıge ótkizýdi josparlapty. Tipti baıqaý jarıalaǵan. Jas Alash gazeti jazǵandaı, báıge úshin dene shynyqtyrý, sport jáne týrızm basqarmasy 54,5 mln teńge bólgen. Jelide atalǵan lot jarıalana salysymen, habarlandyrý kóptiń narazylyǵyn týdyryp úlgerdi. Lot tómendegi sýrettegideı:

tender
Foto: memlekettik satyp alý saıtynan skrınshot

 

 

Memlekettik satyp alýlar saıtynda biz ataǵan at jarysy týraly habarlandyrý berilgen. Tapsyrys berýshi – memlekettik satyp alýlarǵa jaýapty maman Tilekqabyl Esdáýletov dep kórsetilgen. Báıgege qabyldanatyn ótinishter 9-30 sáýir aralyǵynda dep kórsetilgen. Baıqaý sharttary boıynsha tapsyrysty oryndaýshy jarystardy jyl sońyna deıin ótkizýi kerek. 7 sáýirde Atyraý oblysynda sý tasqynyna baılanysty tótenshe jaǵdaı jarıalandy. Al lot memlekettik satyp alý saıtyna 9 sáýirde shyqqan.

Saıtqa jarıalanǵan lottyń tehnıkalyq sıpattamasymen tanysyp shyqtyq. At jarysy ótetin jerge uzyndyǵy 10 metr, bıiktigi 3 metr, qazaqı naqyshtarmen, dekorlarmen bezendirilgen, eki jaǵynan kirip-shyǵýǵa arnalǵan baspaldaǵy bar sahna jáne týrnıket qoıylady delingen, sonymen birge, 8 tóreshi taǵaıyndalatyny da jazylǵan. Odan bólek, shabandozdarǵa 140 dana kıim satyp alynýy kerek. Kıimniń aq, kók, qyzyl jáne sary tústi, árqaısysy 35 danadan bolatyny qujatta kórsetilgen.

Tehnıkalyq sıpattamada:

«Mal dárigeri. Keleńsiz jaǵdaılardyń aldyn alý úshin jergilikti polısıa jáne jedel járdem qyzmetkerleri, vıdeo operator, foto operator tartylyp, 15 dana sertıfıkat, 15 dana kýbok, 15 medal alynýy kerek. Satyp alý jeńimpazy áýeden túsiretin bir dron operatormen qamtamasyz etýi kerek» delingen.

Lotta báıgeden qala men qalanyń shyǵa beris jaqtaryna 3h6 metrlik 6 dana banner ornatý da qarastyrylǵan.

Sharttardyń taǵy biri – báıge Atyraý oblysynda tórt kezeńge bólinip ótkizilýi tıis. Biraq naqty ýaqyty jazylmaǵan. Alaman báıge, top báıge, qunan jarys, taı jarys dep kórsetilipti. Tórtinshi, sheshýshi kezeń qala kúnine oraı uıymdastyrylýy shart. Atyraý qalasy qala kúnin 7 qazanda toılaıdy. Demek, baıqaýdy jeńip alatyn uıymdastyrýshylar báıgeni jyl sońyna deıin ótkizýi qajet.

Atyraý oblysy ákimdigi Jas alashqa bergen jaýabynda:

«Satyp alý nátıjesin jarıalaý 30.04.2024 jylǵa josparlanǵan bolatyn. 7 sáýirde Atyraý oblysy aýmaǵynda tabıǵı sıpattaǵy tótenshe jaǵdaı rejımi jarıalanýyna baılanysty dene shynyqtyrý, sport jáne týrızm basqarmasy «Uly dala tulpary» báıgesine arnalǵan konkýrsty ótkizýdi toqtatý týraly sheshim qabyldady. Memlekettik satyp alý saıtynda 9 sáýirde jarıalanǵan konkýrs jaramsyz dep tanyldy. Ákimdiktiń barlyq qurylymdyq organy tótenshe jaǵdaı kezinde mundaı bastamalarǵa jol berilmeıtindigi týraly habardar etildi. Qazirgi ýaqytta eshqandaı jarys ótkizý josparda joq», – degen.

Mundaı báıge Atyraýdaǵy at sportyn damytý maqsatynda byltyr da ótkizilgen. Ol kezde baıqaý 40 mln 500 myń teńgege jarıalanǵan edi. Konkýrsty Atyraý oblysynyń báıge federasıasy qoǵamdyq birlestigi jeńip alǵan.

Tótenshe jaǵdaıǵa qaramastan konkýrs jarıalap, báıge ótkizemiz dep alashapqyn bolǵan oblys ákimdigi osyndaı qarbalas shaqty paıdalanǵysy kelgenge uqsaıdy. Halyqtyń reaksıasy tasqyn sýdyń tasasynda qalyp qoıady dep oılasa kerek. Álde jýrnalıserdiń nazarynan tys qalady dep oılady ma eken? 

Tasqynnyń beti qaıtar. Shápkenovtyń attary shappaı qalsa, oılaryndaǵy biraz jospar aıaqsyz qalatyn boldy aý!

Bul maqala týraly ne oılaısyz?