Astanada «Taza Qazaqstan: Astana – tazalyq pen tártiptiń úlgisi» aýqymdy ekologıalyq aksıasy ótip jatyr. Bul apta «Móldir bulaq» dep atalady, onyń barysynda sý aıdyndary – ózender men kólderdiń aınalasy qoqystan tazartylady. Ekoaksıa aıasynda GPT neırojelilik chatynyń kómegimen jasalǵan sýretterdiń fotokórmesi ótti, dep habarlaıdy elorda ákimdiginiń resmı saıty.
Qonaqtar men qala turǵyndarynyń nazaryna álemdi jasandy ıntellekt kózimen beıneleıtin 50 erekshe sýret usynyldy. Kelýshiler ekologıaǵa jaýapsyz kózqarasty kórsetetin jáne qorshaǵan ortaǵa qamqorlyq jasaýǵa shaqyratyn sýretterdi kórdi.
GPT chatymen jasalǵan kartınalardyń árqaısysy qazirgi jaǵdaıdy jáne bolashaqty beıneleıdi. Sýretter ártúrli stılde jasalǵan. Jasandy ıntellekt bolashaqty qalaı beıneleıtini kelýshilerdi erekshe qyzyqtyrdy.
İs-shara aıasynda belgili ekobelsendi Shasalım Shagalımov elorda turǵyndary úshin tabıǵatqa janashyrlyq taqyrybynda dáris oqydy.
«Bizdiń elimiz úshin ekologıa óte mańyzdy másele. Bul saladaǵy problemalardyń oń sheshimin qaladaǵy komýnaldyq qyzmetter ǵana emes, turǵyndar da qoldaýy tıis. Kólik terezesinen laqtyrylǵan nemese arnaıy jáshikke salynbaǵan kishkene qoqystyń ózi ekologıaǵa, joldarǵa, kóshelerge, jalpy qalamyzdyń syrt kelbetine teris áser etetinin umytpaýymyz kerek. Qorshaǵan ortaǵa, tabıǵatqa qurmetpen qaraýǵa, jaqsy ekologıa ult densaýlyǵyna tikeleı áser etetinin este saqtaýǵa shaqyramyn», - dedi Shasalım Shagalımov.
Esterińizge sala keteıik, aýqymdy ekoaksıa aıasynda qalany sanıtarlyq tazartý, nóser jáne aryq jelileri, kóshelerdi, trotýarlardy, kvartalishilik aýmaqtardy, qoǵamdyq keńistikter men aýlalardy tazalaý jumystary júrgizilip jatyr.
Sondaı-aq, jasyl jelekterdi kútip-ustaý jáne otyrǵyzý, saýda nysandaryna irgeles aýmaqtardy jınaý, kógaldar men gúlzarlar ornatý, ruqsat etilmegen polıgondardy joıý jáne t.b. jumystar júrgizilýde.
