Tiri bolsam, qazaqqa qyzmet etpeı qoımaımyn!

Álıhan Bókeıhan

Asaý úıretetin Aleksandra

19 mamyr 2024 274

Shyǵys Qazaqstan oblysy Ulan aýdanynyń arýy Aleksandra Den shý asaýdy aýyzdyqtap, sáıgúliktiń qulaǵynda oınaıdy, - dep jazady alash.kz caıty 24.kz-ke silteme jasap. 

Bala kúninen báıgege qatysqan batyl qyz qyzqýýda sońynan qýǵan jigitterdi shańyna da ilestirmeı ketedi. Jylqyǵa qumar jan qazir ulttyq sport túrlerin jandandyryp júr. Jastarǵa tizgin tartyp, jamby atýdy úıretedi.

Aleksandra Den sadaq atýdyń Eýropalyq jáne azıalyq ádisterin jetik biledi. Qazaq dalasynda ósken orys qyzy bala kúninen toqym ushy tımegen shý asaýdy jýasytyp, saıatqa shyqqandy súıedi. Búginde qazaqtyń ulttyq dástúrin ulyqtap, kópke dáriptep júr. Aýdanda sadaq atý jáne atbegiler klýbyn uıymdastyrǵan. Taqymy berik ári jebesi múlt ketpeıtinderdi iriktep, "jamby atýǵa" baýlıdy. Aleksandra bul ónerdi elimizde 20-ǵa jýyq qyz-kelinshektiń ıgergenin aıtyp otyr. Sondyqtan ulttyq sportqa qyzdardy kóbirek tartýdy kózdegen. Qazir úıirmege 40 tálimger jazyldy.

"Qyzdardyń qyzyǵýshylyǵy basym. Birinshi nysanany bir orynnan turyp kózdeımiz. Sadaqty ıgergennen keıin jylqy ústinde shaýyp kele jatyp atýdy da ıgeredi. Bul isti odan ári damytqymyz keledi. Ulttyq sport túrlerinen kásibı sportshylardy tárbıeleý josparda bar", - dedi sportshy Aleksandra Den.

Aleksandra Denniń oqýshylarynyń arasynda 9 jasar qyzy Janel de bar. Anasy sıaqty ol da bala kúninen sáıgúliktiń tizginin tartyp mingen. Attyń qulaǵynda oınaıtyn jas shabandoz qazir el birinshiligine daıyndalyp júr. Báıgige qosar aǵylshyn tuqymynan sáıgúligi de bar. Elimizdiń túkpir-túkpirinde ulttyq sportty dáriptep júrgen mundaı jandardyń arqasynda babalar dástúri umyt qalmasy anyq. Al qyrkúıekte Astanada ótetin Kóshpendiler oıyndarynda Aleksandra Den sıaqty sportshylar elimizdiń týyn asqaqtatary sózsiz.

Bul maqala týraly ne oılaısyz?