Tiri bolsam, qazaqqa qyzmet etpeı qoımaımyn!

Álıhan Bókeıhan

Apat bolǵan aımaqtardyń oqýshylary jazda oqıdy

12 sáýir 2024 582

Qazaqstannyń sý tasyp, tótenshe jaǵdaı jarıalanǵan óńirleriniń oqýshylary bilimin jazda "Jazǵy mektepte" jalǵastyrady. Bul jaıly oqý-aǵartý vıse-mınıstri Edil Ospan aıtyp berdi.

Batys óńirlerde evakýasıalanǵan halyqtyń bir bóligin mektepterge kóshirip jatyr.

– Osy jaǵdaı sol óńirlerdiń bilim sapasyna qanshalyqty teris áser etedi? Sol óńirlerdiń mektepterindegi balalardyń, oqýshylardyń máselesin qalaı rettedińizder? – dep Edil Ospanǵa suraq qoıylǵan.

Suraqqa jaýap bergen vıse-mınıstr oqýshylar jataqhanasy bar mektepter men kolej, ýnıversıtetterge ornalastyrylyp jatqanyn aıtty.

– Elimizdiń kóp óńirinde sý tasqyny júrip jatyr. Tabıǵı sıpattaǵy apat. Bilim sapasyn aıtar bolsaq, 190-ǵa jýyq mektep qashyqtan oqytýǵa aýystyryldy. Ol mektepterdiń oqýshylary qazir qashyqtan oqytylyp jatyr. Biz kóptegen oqýshylardy Bilim ınovasıa, Nazarbaev mektepteriniń, kolejer men joǵarǵy oqý oryndarynyń jataqhanasyna aýystyryp, ýaqytsha bilim alýyn qamtamasyz etip jatyrmyz. Oqýshylardyń oqýǵa qajetti qural-jabdyqtarynyń bolýyn da qadaǵalap otyrmyz, – deıdi vıse-mınıstr.

Edil Ospannyń aıtýynsha, evakýasıalyq pýnktterde ornalasqan balalar múmkindiginshe, jyl boıy jumys isteıtin lagerlerge ornalastyrylyp jatyr. Lagerlerde de oqý prosesi uıymdastyrylǵan. 

– Budan bólek, bul óńirlerdegi balalardyń bilim sapasyn arttyrý úshin jaz mezgilinde dál sol mektepterge arnalǵan jazǵy mektep uıymdastyrylady. Qaı mektepter men qaı oqýshylar ekeni belgili ǵoı – jazǵy mektepti solarǵa ótkizemiz. Ol buryn bolmaǵan, biraq pandemıa kezinde sondaı tájirıbe qoldanyldy, – deıdi ol.

Eske sala keteıik, elde birneshe kúnnen beri birneshe óńirde sý tasyp, ondaǵan aýdanda tótenshe jaǵdaı jarıalandy. Sý tasqyny eń úlken qaýip týǵyzyp otyrǵan óńirler qatarynda Atyraý, Batys Qazaqstan, Soltústik Qazaqstan, Qostanaı oblystary bar. Reseıdiń Or qalasynda dambynyń jarylýy qosymsha qıyndyq týǵyzǵan. Qulsary qalasynda eń kúrdeli jaǵdaı tirkelip, adam shyǵyny tirkeldi.

Premer-mınıstr, shtab jetekshisi osy rette Oljas Bektenov jaýaptylarǵa birqatar tapsyrma berdi.

Bul maqala týraly ne oılaısyz?