Jetisý oblysynda – 8 aýdan, Almaty oblysynda 9 aýdan bolady. Bul jóninde juma kúni Almaty oblysynyń ákimi Qanat Bozymbaev málimdedi. Onyń aıtýynsha, oblystardy bólý jumystary bastalǵan.
Jetisý oblysyna 8 aýdan: Aqsý, Alakól, Eskeldi, Qaratal, Kerbulaq, Kóksý, Panfılov, Sarqan aýdandary jáne Taldyqorǵan men Tekeli qalalary kiredi.
Al Balqash, Eńbekshiqazaq, Jambyl, İle, Qarasaı, Kegen, Raıymbek, Talǵar, Uıǵyr aýdandary, sonymen birge Qapshaǵaı qalasy Almaty oblysynda qalady.
Jetisý oblysyna barlyǵy 352 eldi meken kiredi, al Almaty oblysyna 380 eldi meken qaraıdy.
Oblys ákiminiń pikirinshe, oblysty bólý "memlekettik basqarý prosesin ońtaılandyrady, azamattardyń oblys ortalyǵyna baryp-qaıtýyn jeńildetedi, ishki kóshi-qon máselesin retteýge septigin tıgizedi, óńirdiń damýyna qýatty serpin beredi".
Resmı aqparatqa qaraǵanda, "mańyzy bar ákimshilik-aýmaqtyq birlikterdiń jańa shekaralary jáne basqa da geografıalyq derekter kórsetilgen shemalyq karta daıyndalyp jatyr". Almaty oblysy ákimdiginiń baspasóz qyzmeti taratqan habarlamada ekonomıkalyq esepteýler, taldaý, shtat sanyn qaıta bólý, memlekettik organdar ornalasatyn nysandardy aıqyndaý jumystary da bastalǵany jazylǵan.
Resmı aqparat boıynsha, sońǵy 20 jyl ishinde oblys búdjeti 2001 jyly 21 mlrd teńgeden 2021 jyly 830 mlrd teńgege deıin ósken.
Prezıdent Qasym-Jomart Toqaevtyń naýryz ortasyndaǵy halyqqa joldaýynan keıin Qazaqstanda taǵy úsh oblys paıda bolatyny belgili bolǵan: Shyǵys Qazaqstan oblysynyń Semeı aımaǵynda – Abaı oblysy, Qaraǵandy oblysynyń Jezqazǵan óńirinde – Ulytaý, Almaty oblysy aýmaǵynda Jetisý oblysy qurylady.
Buǵan deıin QazTAG agenttigi úsh oblys maýsym aıyna deıin qurylýy múmkin ekenin habarlaǵan.
